ရခိုင်အဆိုတော် ကိုမြတ်ခိုင်ကျော်နှင့် တွိ့ဆုံမိန်းမြန်းခန်း

3/4/2010

ဘင်္ဂလာဒေ့ခ်ျနိုင်ငံ ကော့စ်ဘာဇားမြို့ (ဖလောင်းချိတ်) မှာ
တည်ဟိရေ အဘယသုခ ဆုတောင်းပြည့် ထိပ်ကျင်းတောင် စေတီပွဲတော်ကို
ဖေဖော်ဝါရီလ ၂၅ ရက်နိန့်မှ ၂၇ ရက်ထိ သုံးရက် တိုင်တိုင် စည်ကား
သိုက်မြိုက်စွာ ကျင်းပခပါရေ။ယင်း ပွဲတော်မှာ ရခိုင်က နာမည်ကြီး
အဆိုတော် တဦးဖြစ်တေ ကိုမြတ်ခိုင်ကျော်လည်း တခြား အဆိုတော်တိနန့် တက်ရောက်
ဖြေဖျော်ခပါရေ ။ သူ့၏ အနုပညာ သက်တမ်း တလျောက်မှာ ပထမဆုံး အကြိမ်
အနီနန့် ကိုမြတ်ခိုင်ကျော်စွာ ဘင်္ဂလာဒေခ်ျ့ နိုင်ငံကို လာရောက် ဖြေဖျော်စွာ
ဖြစ်ပါရေ။ သူဘင်္ဂလာကို ရောက်နီစဉ် အတွင်းမှာ နိရဉ္စရာက သူနန့် တွိ့ဆုံ
မိန်းမြန်းခွင့် ရခပါရေ။ ကိုမြတ်ခိုင်ကျော်က ဘင်္ဂလာဒေခ်ျ့မှာ လာရောက်
ဖြေဖျော်ရရေ တွက် သူ၏  အမြင်နန့် ခံစားချက်ကိုအဂုပိုင် စတင် ပြောကြားပါရေ။

မြတ်ခိုင်ကျော် - အဂုပိုင် ဖြေဖျော်ခွင့်ရရေ အတွက် ၀မ်းသာပါရေ။ အဂုပိုင်
အ၀ီးမှာ ဟိနီကတ်တေ ရခိုင် အမျိုးသားတိကို ကျွန်တော်လာရောက်ပြီး
ဖြေဖျော်ခွင့်ရရေအတွက် အများကြီး ဂုဏ်ယူပါရေ။ ၀မ်းသာမိပါရေ။

နိရဉ္စရာ - ကိုမြတ်ခိုင်ကျော် အနီနန့် အဂုပိုင် လာရောက်
အားပီးကတ်တေ ပရိသတ်အပေါ်မှာဂါ ကြေနပ် နှစ်သိမ့်မှုဟိပါသလား။

မြတ်ခိုင်ကျော် - ကောင်းပါရေ။ အဂုပိုင် လှိုက်လှိုက်လှဲလှဲ ကြိုဆြိုပီး အားလုံးသူ
ပျော်ရွှင် နီကတ်စွာကို မြင်ရရေအတွက် ကျွန်တော်ရို့လည်း အတိုင်းအဆမသိ ၀မ်းသာ
မိပါရေ။

နိရဉ္စရာ- တခြားနိုင်ငံတိမှာ
လားရောက်ဖြေဖျော်စွာနန့် ဘင်္ဂလာမှာ လာရောက် ဖြေဖျော်ရစွာ ဇာပိုင်ကွာခြားမှုတိ
ဟိပါရေလဲ။

မြတ်ခိုင်ကျော်- အထွေအထူးတောခါ့ မဟိပါ။ ကျွန်တော်ရို့ မလေးမှာဟိရေ ပရိသတ်
တိကဆိုကေ ၀မ်းသာ ၀မ်းနည်းဖြစ်ကတ်ပါရေ။ ဒေမှာတော့ခါ အားလုံးက ပျော်ရွင်
နီကတ်စွာကို မြင်ရရေအတွက် ကျွန်တော့် အနီနန့်လည်း ပျော်ရွှင်မိပါရေ။
အဂင့်ဂင့်လည်း အားရ ကြေနပ် မိပါရေ။
နိရဉ္စရာ - ကိုမြတ်ခိုင်ကျော် ဂီတလောကထဲကို စတင်ဝင်ရောက်လာစွာနန့် ဖြတ်သန်း လာခရရေ အနုပညာခရီးလမ်းကို
ပရိသတ်တိသိအောင် စကေချေ(စိချေ) ပြောပြပီးပါလား ။

မြတ်ခိုင်ကျော် - ကျွန်တော် ဖြတ်သန်းလာစွာက ၇၆ ခုနှစ် ကျွန်တော် ၅ တန်း
ကျောင်းသားလောက်ကတည်းက ဂီတာ စတီးပါရေ။ ၁၉၉၃ ခုနှစ် ကျွန်တော် ပထမဆုံး
စီးရီး “သူ့အကြောင်”ကို ဖြန့်ချီ ဖြစ်ပါရေ။ ကျောင်းသား အားကစား
ပွဲတော်နန့် လည်း ကြုံရေ အတွက် ယင်းနှစ်ကတည်းက သီးချင်းတိ ပရိသတ်
ကြားထဲကို ရောက်လားပါရေ။ နောက် ကျွန်တော်ရို့ ရခိုင့် ဂီတလောက တခု
အသစ်ဖြစ်သလို ပြန်ဖြစ်လာရေ အတွက် မိမိကိုယ်လည်း ဂုဏ်ယူမိပါရေ။ ယင်းနှစ်
ကစပြီး သီချင်းတိဆိုလာရေ ဆိုတော့ခါ အခုအချိန်ထိဆိုကေ ၁၈ နှစ် ဟိလားဗျာယ်
ဖြစ်ပါရေ။ စီးရီးကတော့ ၅-ခွေ ၆-ခွေ လောက်ဟိပါရေ။ အားလုံး ကျွန် တော်
Group Songs
တိနန့်ဆိုကေ စီးရီးက ၁၀ ခုလောက်ရာဟိပါရေ။

နိရဉ္စရာ - အနုပညာ လောကထဲကို စလို့ဝင်ရောက်ရေ အခါ
ဇာပိုင် အခက်အခဲ တိဟိခပါလဲ။ ယင်း အခက်အခဲတိကို ဇာပိုင်ကျော်လွှား
ဖြေယှင်းခရပါလဲ။

မြတ်ခိုင်ကျော် - ကျွန်တော် ရခိုင်သခြင်းနန့် ပတ်သက်လို့
လုပ်ရေအချိန်မှာတော့ခါ အခက်အခဲ မဟိပါ။ ဇာဖြစ်လို့ လည်းဆိုတော့ခါ ကျွန်တော်
၈၈ နောက်ပိုင်း ၉၀ ခုနှစ်မှာစလို့ စီးရီးသွင်းဖြစ်ပါရေ။ ယင်းမတိုင်မီ
ကတည်းက ကျွန်တော်ဗမာပြည် ဂီတ လောကထဲမှာ ကျွန်တော်က ၀င်ရောက်လှုပ်ယှား
နီခရေအတွက် ဒေဖက်မှာ လုပ်ရေအချိန်မှာတော့ခါ အခက်အခဲအများကြီး မဟိခပါ။
ယကေလေ့ ရခိုင်စီးရီးသွင်းရေအခါ ကုန်ကျ စရိတ်ပိုင်းတိ၊ ရန်ကုန်လားပြီးကေ
သွင်းရရေအတွက်ကြောင့် ကုန်ကျစရိတ် ဟိပါရေ။ ယင်းစွာကတော့ခါ ဟိဖို့စွာပါရာ။
အခက်အခဲတိက နီရာတိုင်းမှာဟိပါရေ။ အလွယ်တကူနန့်တော့ခါ လူတယောက် အလိုက်သင့်
ဖြစ်လာစွာကတောခါ့ မဟိပါ။

နိရဉ္စရာ - ကိုမြတ်ခိုင်ကျော် ဗမာပြည်ဂီတလောကထဲမှာ
ဇာပိုင်ဝင်ရောက် လှုပ်ယှားခပါသလဲ။

မြတ်ခိုင်ကျော် - ကျွန်တော် ၇၆ ခုနှစ်ကတည်းက ရန်ကုန်ကို ရောက်ပြီးကေ
ကျွန်တော် ၁၀ တန်း ကျောင်းသားလောက်က ကိုလွှမ်းမိုးရို့နန့် ကျွန်တော် ၅
နှစ်လောက် (ဗမာပြည် အနုပညာ လောကထဲမှာ စောဘွဲ့မှူးရို့ IC မဟိခင် ကတည်းက)
သူရို့နန့် အပေါင်းသင်းအဖြစ် ညီချေ အဖြစ် ပေါင်းဖူးပါရေ။ ယင်းနောက်ပိုင်းမှ
ကျွန်တော် ရခိုင်ပြည်ကိုလာပြီး ရခိုင် သခြင်းခွေတိ ရေးဖြစ်စွာပါ။
နိရဉ္စရာ - အဂုပိုင် မြတ်ခိုင်ကျော်ဆိုရေ နာမည်နန့် ရခိုင် အနုပညာလောက ထဲမှာ ပေါ်ထွက်လာဖို့
အတွက် ဇာပိုင်ကြိုးစားခရပါလဲ။

မြတ်ခိုင်ကျော် - ကျွန်တော် ရခိုင်သခြင်းခွေတိကို မရေးမီကတည်းက ကျွန်တော်
ရန်ကုန်မှာ ဖြတ်သန်း နီတုန်း ရခိုင်သခြင်း တပိုင်းတစ ရေးဖြစ်ပါရေ။ ကျွန်တော်
ရေးရေ သခြင်းတိကို ဆိုဖူးခရေသူတိ လည်း ဟိပါရေ။ ၈၈ နောက်ပိုင်း
ကျွန်တော် ရခိုင်ပြည် ရောက်လာရေအခါ ရခိုင် သခြင်းတိ“လှိုင်း လုံးချေ”
သခြင်းတိနန့် ကျွန်တော် ရင်းနှီးလာပါရေ။ ရခိုင် သခြင်းတိ ရေးဖြစ်ပါရေ။
ရေးဖြစ်ရေ သခြင်း တိကို စုထားပါရေ။ ပြီးကေ ၉၂ ခုမှာ ကျွန်တော်
“သူ့အကြောင်း” စီးရီခွေကို ရန်ကုန်မှာ သွင်းဖြစ်ပါရေ။

နိရဉ္စရာ - လက်ဟိ ရခိုင်ဂီတလောက အခြေအနီကို
ကိုမြတ်ခိုင်ကျော်အနီနန့် ဇာပိုင် မြင်ပါရေလဲ။

မြတ်ခိုင်ကျော် - ကျွန်တော် ပြောရဖို့ဆိုကေ ကျွန်တော့်
ပုဂ္ဂလိကအမြင်ပါ။ အဂုကတောခါ့ လူငယ်တိက အခွေတိအများကြီး
အရေအတွက်အားဖြင့် အများကြီး ထွက်လာပါရေ။ အေချင့်ကို ကြိုလည်း ကြိုဆိုပါရေ။
ဥပမာ
high-Pop
လိုင်းတိနန့် ထွက်လာရေ။ သူ့ခေတ်သူ့ အခါနန့် ပေါ်လာရေ ရီစီးကြောင်းတိဖြစ်လို့
ကျွန်တော် ရို့က အေချင့်ကို  ကြိုဆိုပါရေ။ တခု ပြောချင်စွာက အရေအတွက် အများကြီး
ထွက်ပေါ်လာရေ လူငယ်တိကြားထဲမှာ အရည်အချင်း ဟိရေ သခြင်းစာသား ချေတိနန့်
မှတ်လောက် သားလောက်အောင် ကျန်လိုက်တေ စကားလုံးတိနန့် စင်ထက်ကို
ရောက်လာရေ လူငယ်တိကို ကောင်းကောင်းမမြင်တွိ့ရပါ။ အေချင့်တခုကို စိတ်မကောင်း
ဖြစ်မိပါရေ။ လူငယ်တိ ကြိုးစားစွာကိုလည်း ချီးမြှင့်ပါရေ။ ယကေလေ့ အဂုက
သခြင်း စကားလုံးပိုင်း သံစဉ်ပိုင်းကို စီးစီးစစ်စစ်နန့်
ဖွဲ့နွဲ့ပြီးလုပ်တေ အပိုင်း တိက စကေချေ (စိချေ) အားနည်းချက်ဟိပါရေ။
ကျွန်တော် ရို့ကျဆင်းလာရရေ အကြောင်းအရင်း တိကဆိုကေ ကျွန်တော်ရို့
ရခိုင်ဂီတလောက သက်သက် မဟုတ်ပါ။ ဗမာပြည် တခုလုံးမှာဟိရေ ဂီတလောကမှာ
ဆိုကေ နည်းပညာပိုင်း တိုးတက် လာစွာမှန်ကေလေ့ အားလုံး အယှုံးပြပြီးကေ
လုပ်လို့မရရေ အခြေအနီတိကို လက်ဟိ အမှန်အတိုင်း မြင်နီကြရပါရေ။

နိရဉ္စရာ - ကိုမြတ်ခိုင်ကျော် အနီနန့်
ကိုယ်ပိုင်စီးရီး ဇာနှစ်ခွေလောက် ထုတ်ပြီးပါဗျာယ်လဲ။

မြတ်ခိုင်ကျော် - အများတော့ခါ မဟိပါ။ ကျွန်တော် စဆိုရေ ၁၉၉၃ ခုနှစ် ကတည်းက
ဂနိန့်အဖိဆိုကေ တိတ်ခွေခေတ်မှာ ၅ ခွေလောက်ဟိပါရေ။
VCD ခေတ်မှာ
စုပေါင်း စပ်ပေါင်းဆိုစွာနန့် ဆိုကေ ကျွန်တော် ကိုယ်တိုင် လက်ဟိလုပ် ထားရေ
ရခိုင့်ဂီတ အဟာရရို့ပါ အားလုံး ပေါင်းလိုက်မှ ကျွန်တော့်မှာ ၁၀ ခွေလောက်
ဟိပါသိမ့်ရေ။

နိရဉ္စရာ- အစ်ကို သီဆိုထားရေ သခြင်းခွေတိထဲမှာ
ဇာသခြင်းကို ကြေနပ်မှု အဟိဆုံးဖြစ်ပါရေလဲ။

မြတ်ခိုင်ကျော် - ကျွန်တော် ပုဂ္ဂိုလ်စွဲကင်းကင်းနန့် ပြောရဖို့ဆိုကေ-
ကျွန်တော် ကိုယ်တိုင် ခံစားခရရေ သခြင်းလည်းဖြစ်ရေပိုင်
ကျွန်တော်ကိုယ်တိုင်ရေးထားရေ“၀တီလေးရပ် ညီညွတ်ကတ်မယ်”ဆိုရေ သခြင်းကို
ကျွန်တော်ကျောက်ဖြူမှာ ပွဲတပွဲ လုပ်တေ အခါ ယင်းကရလာရေ အတွိ့အကြုံနန့်
ယင်းသခြင်းကို ရေးဖြစ်ပါရေ။ ယင်းသခြင်းကို ရေးဖြစ်ရေအကြောင်းအရာကလည်း
တကယ့် အစစ်အမှန်ဖြစ်ရေ။ ယင်းကြောင့် ယင်းသခြင်းကို ကျွန်တော်အားရ
ကြေနပ်မိပါရေ။ အ၀ီးရောက် နီရေသူတိပါ အနီးမှာဟိရေသူတိပါ
ကျွန်တော်ရို့ အသင်းအဖွဲ့အစည်းတိုင်းမှာ တွိ့ကတ်ရရေ ကျွန်တော်ရို့ တောင်
ပိုင်းသား မြောက်ပိုင်းသားကိစ္စလည်း အားလုံး ပါပါရေ။ ကျွန်တော်ရို့
ယင်းပိုင်မဖြစ်သင့်ပါဆိုပြီး ကျွန်တော် ယင်းသခြင်းကို ကျွန်တော်
ကိုယ်တိုင်ရေးပြီး ကျွန်တော်ကိုယ်တိုင်ဆိုဖြစ်ပါရေ။ ယင်းသခြင်းကိုတော့ခါ အားရကြေနပ်ပါရေ။

နိရဉ္စရာ- ၂၀၁၀ မှာ စီးရီးအသစ်တိ ထွက်ဖို့
အစီအစဉ်ဟိပါလား။ တကယ်လို့ ဟိရေဆိုကေ စီးရီးအမည်နန့် ယင်းစီးရီးမှာ
ပါဝင်ရေ သခြင်းခေါင်းစဉ် တချို့ကို ပြောပြပီးပါလား။

မြတ်ခိုင်ကျော်- ရပါရေ။ အေချင့်ကကိစ္စမဟိပါ။ အခုကျွန်တော်
May စတီရီယိုမှာ
ကိုမောင်မောင်လွင်ရို့နန့် သွင်းနီရေ စီးရီးကတော့ခါ “ပြန်ဆုံခွင့်” ဆိုပြီး
လောလောဆယ် အကြမ်းအားဖြင့် အမည် ပီးထားပါရေ။အေခွေမှာဆိုကေ ကျွန်တော့်
တပည့်မချေဖြစ်တေ ဇင်မာထွန်းနန့် ညီမင်းခိုင် အပါအ၀င် ကျွန်တော်ရို့
သုံးယောက် တစ်ခွေ လုပ်နီပါရေ။ ယင်းအထဲမှာ သီချင်းတိကတော့ခါ အမ်ပလိုက်
သီချင်းတပုဒ် ပါဝင် ပါရေ။ “ သက်ဆုံးတိုင်” ဆိုရေ သီချင်းကိုလည်း
ထည်ြ့ပီး ဆိုထားပါရေ။

နိရဉ္စရာ - ရခိုင် အနုပညာလောက အေထက်တိုးတက်လာအောင်
ဇာပိုင် လုပ်သင့် ရေလို့ မြင်ပါသလဲ။

မြတ်ခိုင်ကျော် - အဂုပိုင် နည်းပညာပိုင်းတိ တိုးတက်တေ အချိန်ခါမှာ
လုပ်လာကတ်တေ လူငယ်တိလည်း အများကြီး ပေါ်ထွန်းလာပါရေ။
ကျွန်တော်ရို့လုပ်သင့်ရေလို့ ထင်ရရေ အလုပ်ကတော့ခါ သခြင်းဆိုစွာက
စကားလုံးနန့် သံစဉ်ကို ပေါင်းဖက်ပြီးမှ သခြင်းလို့ ဖြစ်လာရေအတွက်နန့်
စကားလုံး ပိုင်းဆိုင်ရာကို စီးစီးစစ်စစ်နန့် လုပ်ပြီးကေ သံစဉ်ပိုင်း
ဆိုင်ရာကိုလည်း လူနားထဲမှာ ၀င်လာအောင်၊ ပြီးကေစကားလုံး ဆိုကေလည်း
ကိုယ့်သခြင်းကို နားထောင်ရေအချိန်မှာ ရင်ထဲမှာ ကျန်လိုက်အောင်ယင်းပိုင်
စကားလုံးမျိုးတိကို ရွီးပြီးကေ ရေးစပ်ဖို့ ဆိုကေ ပိုပြီး ကောင်းဖို့် ထင်ပါရေ။
ရခိုင့်ဂီတ လောကတခုလုံး တိုးတက်ဖို့အတွက်ကတော့ခါ စကေချေ (စိချေ) ခက်ခဲ
နီပါသိမ့်ရေ။

နိရဉ္စရာ- ကိုယ်ရေးရာဇ၀င် အကျဉ်းကို ပရိသတ်တိ
သိနိုင်အောင် နည်းနည်းချေပြောပြ လို့ရနိုင်ဖို့လား။

မြတ်ခိုင်ကျော် - အထူးအထွေတော့ခါမဟိပါ။ ကျွန်တော်က မြောက်ဦး
ဇာတိဖြစ်ပါရေ။ ကျွန်တော့် မိဖကတော့ခါ ဈီးဇာကျွန်းကပါ။ ကျွန်တော့် အဖက
ဦးအောင်ပြည့်စုံ အမိက ဒေါ်မကျော့သာ ဖြစ်ပါရေ။ အဂုလောလောဆယ် ကျွန်တော်
စစ်တွေမှာ ဇနီး၊ ကချေနှစ်ယောက်နန့် အတူနီ ပါရေ။

နိရဉ္စရာ - ကိုမြတ်ခိုင်ကျော်ကို
အမြဲတမ်းအားပီးနီကတ်တေ ပရိသတ်တိကို ဇာပိုင်စကားလက် ဆောင်တိ ပီးချင်ပါလဲ။

မြတ်ခိုင်ကျော် - စကားလက်ဆောင်အနီနန့် ပြောရဖို့ဆိုကေ -- ကျွန်တော်ရို့လည်း
တတ်နိုင်ရေဖက်က အမြဲတမ်း ရပ်တည် ကြိုးစားနီပါရေ။ လက်ဟိကလည်း
စားဝတ်နီရေး အခြေအနီအရ တဖက်တလမ်းက ကိုယ့်ဘ၀အတွက် လှုပ်ရယှား နီရရေပိုင်
တတ်နိုင်ရေဖက်က အနုပညာကိုလည်း ဆက်လက်ပြီး ကြိုးစား ဆောင်ရွက်
ပီးလားဖို့ပါ။ လက်ဟိကျွန်တော့်ကို မြတ်ခိုင်ကျော်လို့ အမည်တခု ဖြစ်လာအောင်
ဝိုင်းဝန်းပြီး ပံ့ပိုးပီးခကတ်တေ အနှစ် ၂၀ နီးပါး ဟိနိန်ဗျာယ် ဖြစ်တေ
ပရိသတ်၊ ကျွန်တော်ရို့ ရခိုင်သား အားလုံးကို ကျွန်တော် တတ်သိသလောက်
အနုပညာချေနန့် တသက်လုံး ပီးဆပ်လားမယ်ဆိုရေ စကားချေရာ ကျွန်တော်
စကားလက်ဆောင် ပီးချင် ပါရေ။

(ကိုမောင်အေးမှ တွေ့ဆုံမေးမြန်းသည်။)
မှတ်ချက်။ နိရဉ္စရာ ကကူးယူဖော်ပြထားပါရေ။