ရခိုင်ပြည်နယ် အစိုးရကို ဇာလူတိက ဖွဲ့စည်းနိုင်ဖို့လဲ

9/12/2010

ရခိုင်ပြည်နယ်ထဲက အကြီးမားဆုံး ရခိုင်အမျိုးသား ပါတီတစ်ခုဖြစ်တေ ရခိုင်တိုင်းရင်းသားများ တိုးတက်ရေး ပါတီက ယခုအခါ လွှတ်တော် အသီးသီးမှာ ပါဝင် ယှဉ်ပြိုင်ကြဖို့ ကိုယ်စားလှယ် လောင်း အမည်စာရင်းတိကို ရွီးကောက်ပွဲ ကော်မယှိန်မှာ တင်သွင်းခပြီးဖြစ်ပါရေ။ အခုပိုင် တင်သွင်းခပြီးရေ နောက်ပိုင်းမှာ ပါတီ ဥက္ကဌ ဒေါက်တာအေးမောင်ကို နိရဉ္စရာက အိန်တာဗျူး ပြုလုပ်ခွင့် ရခပါရေ။ အိန်တာဗျူး အပြည့် အစုံမှာ အောက်ပါ အတိုင်း ဖြစ်ပါရေ။

-------------------------------------------------------------------------------------------------------

မိန်း။ ။ ဥက္ကဌရို့ ပါတီ အနီနန့် လွှတ်တော် ကိုယ်စားလှယ်လောင်း ဇာနှစ်ဦး စာရင်း တင်သွင်း နိုင်ခပါလဲ။

ဖြေ။ ။ ကျွန်တော်ရို့က ရခိုင်ပြည်နယ်ထဲမှာ အားလုံးပေါင်း လွှတ်တော် ကိုယ်စားလှယ် ၆၃ နီရာမှာ ၄၃ နီရာ ကျွန်တော်ရို့ လွှတ်တော် ကိုယ်စားလှယ်လောင်း တင်သွင်းနိုင်ခပါရေ။ နီရာပေါင်း ၁၈ နိန်ရာလောက်က လစ်ဟင်းမှု ဟိလားခပါရေ။ ဗမာပြည်ထဲမှာတောခါ့ ဧရာဝတီတိုင်းမှာ တစ်နီရာ၊ ရန်ကုန်တိုင်းမှာ တစ်နီရာ ကျွန်တော်ရို့ တင်သွင်းနိုင်ခပါရေ။ ကျွန်တော်ရို့ စုစုပေါင်း ၄၅ ဦးကို တင်သွင်း နိုင်ပါရေ။

မိန်း။ ။ ရခိုင်ပြည် သူလူထုတိ၏ ထောက်ခံ အားပီးမှုက ရတပ အပေါ်မှာ ဇာအတိုင်း အတာထိ ဟိပါလဲ။ ရခိုင် လူထု၏ သဘောထား ဇာပိုင်ဟိရေဆိုစွာကို စကေချေလောက် ယှင်းပြပီးပါလား။

ဖြေ။ ။ ကျွန်တော်ရို့ ကျောက်ဖြူ၊ မာန်အောင်နန့် ရမ်းဗြဲရို့မှာ လှုပ်ရှားနီပါရေ။ ကျောက်ဖြူ မှာလည်း ရုံးဖွင့်ထားယာ။ ရမ်းဗြဲမှာလည်း ရုံးဖွင့်ထားပြီးယာဖြစ်ပါရေ။ ကျေးရွာတိ အရောက် ဆွေးနွေး ပွဲတိ ကျွန်တော်ရို့ လုပ်နိန်ပါရေ။ ထောက်ခံမူတိရနိန်ရေလို့လည်း သိရပါရေ။ လူထု ပါဝင်မှုက ၁၉၉၀ ခုနှစ်မှာထက် ပိုပြီးကေ ကျွန်တော်ရို့ရခိုင်ပါတီ အပေါ်မှာ တိမ်းညွတ်မှု ပိုများ လာရေဆိုစွာကို ကျွန်တော်ရို့သနီရပါရေ။

မိန်း။ ။ အခု လာဖို့ရွီးကောက်မာ ရခိုင်ပြည်နယ်ထဲမှာ ဇာပါတီက အနိုင်ရဖို့လို့ ခန့်မှန်းထားပါရေလဲ။

ဖြေ။ ။ ကျွန်တော်ရို့က တချို့ နီရာတိမှာ အနိုင်ရဟိခသော်လည်း Majority Vote ကိုတောခါ့ လက်ဟိ ကြံ့ခိုင်ရေးနန့် တပ်မတော်ကရာ အနိုင်ရဟိပြီးကေ  အစိုးရဖွဲ့လားနိုင်ဖို့လို့ရာ ကျွန်တော်က ယူဆပါရေ။ ကျွန်တော်ရို့က အဓိက အတိုက်အခံ အနီနန့်ရခိုင်ပြည်နယ် လွှတ်တော်မှာ ဟိနီဖို့လို့ထင်ပါရေ။ ပြည်နယ် ဖွံ့ဖြိုး တိုးတက်ရေး အတွက် လိုအပ်လာလို့ဟိကေ လိုအပ်တေ ဥပဒေတိကို ပြည်နယ် လွတ်တော်မှာ ပြဌာန်းလားနိုင်အောင် ကြိုးစား ဆောင်ရွက်လားပါဖို့။ မလိုလားအပ်တဲ့ ဥပဒေတိဆိုလို့ဟိကေ ပယ်ဖျက်လားနိုင်အောင် ကျွန်တော်ရို့ ကိုယ်စွမ်း ဥာဏ်စွမ်း ဟိသလောက် ကြိုးစားဆောင်ရွက်မေလို့ မျှော်မှန်းထားပါရေ။

မိန်း ။ ။ အခု ဖြစ်ပေါ်လာဖို့ ပြည်နယ် လွှတ်တော်ထဲမှာ ဥက္ကဌရို့ ပါတီအနီနန့် ဇာအတိုင်း အတာထိ လုပ်ပိုင် ခွင့်ရဖို့လို့ မျှော်လင့် ထားပါလဲ။

ဖြေ။ ။ ရခိုင်ဒေသ ဖွံ့ဖြိုးဖို့ဆိုလလို့ဟိကေ၊  ဥပမာ -ရွှေဂတ်စ်ကို ရခိုင်ပြည်က ရခိုင်အမျိုးသားတိ မြင်တွိ့ နီရပါရေ။ ယကေလဲ ရခိုင်ပြည်နယ်ကို ပြန်ကြည့်လို့ဟိကေ လက်ဟိ ထင်းတိ မီးသွီးတိကိုရာ အသုံးပြု နီရပါရေ။ ယင်းစွာတိ အားလုံးက ပတ်ဝန်းကျင်ပျက်စီးမှုကို ဖန်တီးထားစွာကို တွိ့ရပါရေ။ ရီအားလျှပ်စစ် ထုတ်လုပ် ပြန်ကေလည်း သဘာဝ ပတ်ဝန်းကျင် ပျက်စီးမှုကို အများကြီး ထိခိုက် လားနိုင်ပါရေ ။ ယင်းပိုင်ဆိုကေ  ဒေနှစ်ခုလုံးကို ပြန်ပြီးကြည့်ရေ အခါ ရီအောက်က ရွှေဂတ်စ် ထုတ်တေ အခါလည်း ရီအောက် ကြမ်းပြင်ရီ တနည်းတဖုံအားဖြင့် ပျက်စီးလားနိုင်ပါရေ။ ဒေနှစ်ခုလုံးကို ကျွန်တော်ရို့ ပြန်ပနာ ထိန်းသိမ်း ဖို့လိုပါရေ။ ဒေချင့်နန့် ပတ်သက်လို့ ကျွန်တော်ရို့ ပြဌာန်း ပိုင်ခွင့် ရအောင်၊ ကျွန်တော်ရို့ လုပ်ပိုင်ခွင့် တချိန်ချိန်မှာ ရဟိလာအောင် လုပ်ဆောင် လားကတ်ရဖို့ဖြစ်ပါရေ။

မိန်း ။ ။ အခု ရခိုင်ပြည်သူ အများစုက ခုရွီးကောက်ပွဲကို ကောင်းမလိုလားကတ်လို့ သိရပါရေ ။ ရွီးကောက်ပွဲက ရခိုင်ပြည်သူတိ အတွက် တခုလည်းထူးခြား ပြောင်းလဲမှုကို ဖြစ်စီဖို့ မဟုတ်လို့လည်း ပြောနီကတ်ပါရေ။ ဥက္ကဌ ရို့ အနီနန့် ရွီးကောက်ပွဲ ဝင်ရရေ အခြေအနီနန့် ပတ်သက်ပြီးကေ  ရခိုင်ပြည်သူတိကို ဇာတိပြောချင်ပါလဲ။

ဖြေ။ ။ ရခိုင်ပြည်သူလူထုကို ကျွန်တော်ရို့ ပြောပြချင်စွာက ရခိုင်ပြည်နန့်ပတ်သက်လို့ ၂၀၀၈ ဖွဲ့စည်းပုံ အရ တိုင်းဒေသကြီးနန့်  ပြည်နယ်တေိကို ဥပဒေပြုခွင့် ၈ မျိုး ပီးထားပါရေ။ နောက် အခွန် အတုတ် ကောက်ယူမှုနန့်  ပတ်သက်လို့ ၁၆ မျိုး ကျွန်တော်ရို့ကို လုပ်ပိုင်ခွင့်ပီးထားပါရေ။ ယင်းစွာတိကို ၁၉၇၄ ခုနှစ် ဖွဲ့စည်းပုံနန့် နိုင်းယှဉ်ရေအခါ  ၂၀၀၈ ဖွဲ့စည်းပုံက  စကေချေလောက် ပျော့ပျောင်းရေလို့ ကျွန်တော်ရို့ ထင်ရပါရေ။ သို့သော်လည် တကယ့်တကယ် တိုင်းဒေသ အားလုံး ရခိုင်အပါအ၀င် ဗမာပြည်မှာ ပြည်နယ်နန့် တိုင်းဒေသတိ ဖွံ့ဖြိုးအတွက် ပီးထားစွာတိနန့်မလုံလောက်ပါ။ ဒေထက် လုပ်ပိုင်ခွင့် စုံလင်ဖို့ လိုရေလို့ ကျွန်တော်ရို့ထင်ပါရေ။

(ပြီး)

 ----------

(နိရဉ္စရာ သတင်းဌာနမှ)