ကျေးဇူးစကား တစ်ခွန်းတော့ခါပြောပါ

အပန်းဖြေစခန်းက ပြန်လာရေ ကားတစ်စီးသည် လမ်းတစ်နိန်ရာ ကျုပ်အိုင်မှာ ရပ်လားခသည်။ ကားထက်က သသားနနား ဝတ်ဆင်ထားရေ လူတစ်ဦးက ဘေးပတ်ဝန်းကျင်ကိုကြည့်ပြီးကေ-

“ငါ့ကားအောက်ထဲဝင်ပြီး အသူ ဝက်အူကျပ်ပီးနိုင်ဖို့လဲ” လို့ အော်ဟစ်ပနာအကူအညီ တောင်း လိုက်သည်။

ကား၏ဆီတိုင်ကီက ဝက်အူတစ်ချောင်း ချောင်နိန်လို့ ဆီတိယိုနိန်ရေအတွက်ကြောင့် ရပ်တန့်လားခခြင်းဖြစ်ပါသည်။ ဓာတ်ဆီဆိုင်နန့်လည်း စကေအလှမ်းဝီနိန်သောကြောင့် ကားပိုင်သျှင်၏စိတ်ကား အိုးဖုံးပူအထက်က ပုရွက်ဆိတ်ချေတိပိုင် လှုပ်ယှားနိန်သည်။ ကားပိုင်သျှင်ဘေးက လှလှပပပျင်ထားရေ အမျိုးသမီးတစ်ဦးက-

“ဆုငွေဟိကေ ကူရေလူ ပေါ်လာလိမ့်မည်” လို့ပြောလိုက်ပါသည်။

ယေခါကားပိုင်သျှင်သည် တန်ဖိုးကြီး ပေသာတစ်ရွက်ကို အလျှင် အမြန်ထုတ်ပြီးကေ-

“ဝက်အူကျပ်ပီးရေလူ ဒေပေသာနန့်ထိုက်တန်မည်”
လို့ ပြောလိုက်သည်။

ဝိုင်းကြည့်နိန်ရေ လူတိထဲက လူငယ်တစ်ဦး တစ်ချက်လှုပ်လားခသည်။ ယကေလေ့ ဘေးလူတစ်ယောက်က

“ပေသာဟိရေလူတိစကားကို မယုံကေ့” ဆိုပြီးကေလှမ်းဆွဲလိုက်သည်။

ယင်းအချိန်မှာ အချေတယောက်က ထွက်လာပြီးကေ-
“ငါ ကူမေ” လို့ပြောလိုက်သည်။

ယင်းအချေက ကားအောက်ထဲဝင်ပြီး ဝက်အူကို ကျပ်ပီးလိုက်သည်။ တစ်မိနစ်တောင် မကြာရေအချိန်မှာ ကားအောက်က ထွက်ပြီး ကားပိုင်သျှင်ကို မျှော်လင့်ချက်မျက်လုံးနန့် ကြည့်န့်ကြည့်နိန်ခသည်။ ကားပိုင်သျှင်က ယင်းအချေကို အဂုနက ငွေကိုလှမ်းပီးဖို့လို့အလုပ်မှာ အမျိုးသမီးက -

“ဒေပေသာကိုပီးဖို့လို့လား? အကြွီတစ်ချို့ ပီးလိုက်ပါ”
လို့ ဝင်ဟန့်လိုက်ပါသည်။

ကားပိုင်သျှင်က အမျိုးသမီးဘားက ပေသာအကြွီကိုယူပနာ အချေကိုလှမ်းပီးလိုက်ပါသည်။ အခကေမယူဘဲ ဂေါင်းခါပြသည်။ ဝိုင်းကြည့်န်ိန်ရေ လူအုပ်ကြားက ဝေဖန်သံတစ်ချို့ထွက်လာရေခါ ကားပိုင်သျှင်က အကြွီ တစ်ချို့ ထပ်ပေါင်းပြီးကေ အချေကိုလှမ်းပီးလိုက်ပြန်သည်။ အချေက ဂေါင်းခါပြန်ရေခါ ကားပိုင်သျှင်က စိတ်ဆိုးပနာ-

“ဇာလဲ? မင်းကနည်းသိမ့်ရေလို့ထင်လား? နည်းရေထင်ကေလုံးဝမပီးယာနှ” လို့ အော်လိုက်သည်။

“နည်းရေထင်လို့မဟုတ်ပါ။ ငါ့ဆရာပြောပါရေ။ လူတိကို ကူညီခြင်းကား အကျိုးအမြတ် ရဖို့အတွက် မဟုတ်ပါ” လို့ အချေက ပြန်ပြောရေခါ-

“ယင်းပိုင်ဆိုဂေ မင်းဇာဖြစ်လို့ မလားသိမ့်စော်လဲ?” လို့ ကားပိုင်ရှင်က စိတ်ပျက်လက်ပျက် မိန်းလိုက်ပြန်သည်။

“ဘေးဘေဘားက ကျေးဇူးတင်ပါရေ-ဆိုရေ စကားတစ်ခွန်းကို ငါစောင့်နိန်စော်ပါရာ” လို့ အချေကပြန်ပြောလိုက်ပါသည်။

လူအချင်းချင်းကြားက အပြန်အလှန်နားလည်မှုစွာ ကကောင်းကြောက်ဖို့ကောင်းကြောင့်ဒေပုံပြင်က ပြော လားခပါသည်။ တူညီရေ အဖြစ်အပျက်တစ်ခုမှာ ကာယာကံသျှင်ဖက်က ကြည့်ကေတစ်မျိုး၊ တစ်ခြားလူဖက်က ကြည့်ရင်တစ်မျိုး စရေ အမြင်မတူစွာတိ ဟိတတ်ကြသည်။

................
(မှတ်ချက်။ ။ကိုယ်တိုင်ရွီးထားစော်မဟုတ်ပါ။ သူငယ်ချင်းတယောက်ဘားက Forward လုပ်စော်ကိုကြိုက်လို့ ရခိုင်ဘာသာသို့ပြန်ပြီကေ တင်လိုက်ခြင်းဖြစ်ပါသည်။)

လူမျိုးခြားကို လက်ငါးချောင်းမပီးလီကဲ့

ဒေဟင့်က အကျွန်တော် (၂၀၀၁) နှစ် ဧပြီလက ရန်ကုန်သို့လာဖို့ခါ အဘောင်သျှင်မှာလိုက်တေ စကားတခွန်းပါ။ အကျွန်တော် ရန်ကုန်သို့လားဖို့အတွက် ရွာကနီပနာ စစ်တွေသို့ မထွက်ခင် မိုးထက်ဘက်မှာ အဘောင်သျှင်က ကျွန်တော့ကိုခေါ်ပြီးကေ ငါ့မြီးချေ ငါ့မြီးချေအတွက် အဘောင်သျှင် လူကြီးသူမတိ လက်ဆင့်ကမ်းခရေ စကားတခွန်းကို မှာလိုက်ချင်ရေဆိုပနာ ဒေစကားကိုပြောလိုက်စွာပါ။ အဘောင်သျှင်က ဇာပြောလဲဆိုကေ “လူတိုင်းလူပြည်မှာ ဘ၀ကြီးပွါးရေးအတွက် လားရောက်နီထိုင်ရကေလည်းသော့ လူမျိုးခြားကို လက်ငါးချောင်း မပီးလီကဲ့” လို့ အဘောင်သျှင်က ပြောပါရေ။

ကျွန်တော်လည်း အဘောင်သျှင်ပြောစွာကို နားမလည်လို့ လက်ငါးချောင်းကို မပီးလီကဲ့ဆိုစွာ ဇာအဓိပ္ပါယ်ပါလဲလို့ ပြန်မီးကြည့်လိုက်တေ။ ယေခါ အဘောင်သျှင်က ကွမ်းတစ်ယာယာပနာ အကျွန်တော့ကို ယှင်းပြပါရေ။ ငါ့မြီးချေ လူ့ဘ၀မှာ တိုးတက်အောင်မြင်ဖို့အတွက် အရိုအသေပီးသင့်ရေလူကို အရိုအသေပီးရဖို့။ ယင်းပိုင် အရိုအသေပီးရေခါ ငါ့မြီးချေ လက်ဆယ်ချောင်းကို အသုံးပြုလို့ အရိုအသေပီးလီ။ ငါ့မြီးချေ တိုးတက်အောင်မြင်လိမ့်မေ။

လူတယောက်မှာ လက်ချောင်းချေ ဆယ်ခုစီပါရေမလား၊ လူကြီးသူမတိကို အရိုအသေပြုရေခါ ဆယ်ချောင်းလုံးကို အသုံးပြုရရေ။ လူ့သဘာအရ အချိန်တန်အရွယ်ရောက်လို့ အိမ်ထောင်ယာသားပြုရေခါ သမက်တက်ပွဲမှာ ယောက်ျားဘက်က လက်ငါးချောင်းနန့် မမဘက်က လက်ငါးချောင်းကို ပေါင်းစပ်ပီးကတ်တေ။ ယင်းချင့်ကို အိမ်ထောင်ပြုရေလို့ ခေါ်ရေ။ ယင်းပိုင် အိမ်ထောင်ပြုရေခါ ငါ့မြီးချေရေ ရခိုင်မဟုတ်တေ လူမျိုးခြားနန့် အိမ်ထောင်မပြုလီကဲ့လို့ အဘောင်သျှင်က ပြောချင်စွာ။

လူမျိုးခြားကို လက်ငါးချောင်းပီးလိုက်ကေ ကိုယ့်ဘ၀နစ်နာရေ။ ကိုယ့်လူမျိုး၊ ကိုယ့်ယိုင်ကျေးမှု၊ ကိုယ့်အစိုင်အလာတိ ဆုံးယှုံးတက်တေ။ ငါ့မြီးချေကို အဘောင်သျှင်ရို့ ထိန်းသိမ်းခရေ အမွီအနှစ်တိကို ဆက်လက်ထိမ်းသိမ်းစီချင်ရေ။ အဘောင်သျှင်က ယင်းပိုင်ပြောပနာ အဆုံးသတ်လိုက်ပါရေ။ အကျွန်တော်လည်း အဘောင်သျှင်နားမှာ တနားထိုင်ပျာ ရှိသုံးကြိမ်ခိုးပနာ ပြန်ထပါလတ်တေ။

အကျွန်တော့် အဘောင်သျှင်စကားကို ရခိုင်သူ၊ ရခိုင်သားရို့အားလုံး စောင့်ထိန်းနိုင်ပါစီ။

(ရန်နိုင်စိုး)