ဖောက်ပြန်နီသော ရခိုင်စကားအချို့

တနိ အကျွန့်သူငယ်ချင်းနှင့် အကျွန်သည် ဘောင်းဒွတ်သားစု ရွာလယ်ခွဆုံအနားဟိ စင်တွင်ထိုင်နီကတ်ပါသည်။ ယင်းစဉ် အသက် ၇၀ ပတ်ဝန်းကျင်၌ဟိမည့် ဝါကြီးတယောက်သည် လမ်းမှလားယင်း စင်ရှိသို့ရောက်သောအခါ တန့်လိုက်ပြီး တခုခုမီးလိုဟန်နှင့် အကျွန်ရို့ကိုကြည့်နီပါသည်။ ဝါကြီးအမူအရာကို အရိပ်ကျသော အကျွန့်သူငယ်ချင်းက အကျွန့်လက်ဦးစွာပင်။
“ဇာမီးချင်ပါလေ့ အဘိုး”ဟုမီးလိုက်ပါသည်။ ထိုအခါဝါကြီးလည်း အကျွန်ရို့အနားသို့ကပ်လာကာ။
“ပွဲစား စောသာကျော်အိမ်ဇာနားမှာလဲဝေ”ဟုမီးပါသည်။ ပွဲစားစောသာကျော်မာ အကျွန်ရို့ရွာ၌ လူသိများ လူသိများသူတဦးဖြစ်သည့်အလျှောက် အကျွန့်သူငယ်ချင်းက ချက်ချင်းပင်။
“အဘိုး၊ ဒေလမ်းတည့်တည့်လားပါလီ။ ယှိက ခွဆုံကိုရောက်တေခါ အယှိဘက်ကိုကွေ့ပါ။ လက်ျာဘက်နှစ်ဆောင်ခြာ သုံးဆောင်တက် သံဖြူမိုးလို့အိမ်ပါ။” ဟုသွက်လက်စွာညွှန်လိုက်၏။ ယင်းအခါ ဝါကြီးမာ နားမလည်ဟန်နှင့် မျက်မှောင်ကုတ်လားပြီး။
“ဇာဝေ၊ ယှိကခွဆုံ အယှိဘက်၊ ဇာအယှိဘက်လဲ”
“ဟုတ်ပါရေ အဘိုး၊ ရှိကခွဆုံ အရှိဘက်ကို ကွေ့ပြီးကေ၊ သုံးအိမ်အတက်မာ”
“ဒေသူက ယှိကခွဆုံ အယှိဘက်လို့ပြောနိန်လို့” ဟုပြောကာ ပွဲစား စောသာကျော်၏အိမ်ဘက်သို့ ထွက်လားလီပါသည်။

ရက္ခိုင်စာလုံးပေါင်းတည်ငြိမ်ရေး“ဖြစ်သင့် မဖြစ်သင့်”ရက္ခိုင်စကားလုံးများ

ကျွန်ုပ်ရို့ ရက္ခိုင်လူမျိုးတွင် ရက္ခိုင်ဘာသာစကား သီးခြားဟိ၏။ စာပီတွင် ခေတ်အလျောက် အမျိုးမျိုးပြောင်းလဲမှု အနည်းနန့် အများ ဟိနိုင်သော်လည်း၊ ရက္ခိုင်ဘာသာစကားမှာ ဒေနိထိ အခိုင်အမာဟိသေး၏။ မိမိ၏ဘာသာစကားကို ထိန်းသိမ်းရကောင်းမှန်းမသိဘဲ ဘာသာစကားစည်းဖောက်နီကြသော ရက္ခိုင်တချို့ ဟိစီကာမူ ကိုယ့်ရက္ခိုင်ဘာသာစကား မပျက်ပြားရအောင် ထိန်းသိမ်းစောင့်ရှောက်နီကြသော ရက္ခိုင်အများအပြားဟိကြ၏။ ထိန်းသိမ်းစောင့်ရှောက်ရာတွင် နည်းလမ်း နှစ်မျိုးနှစ်စားဟိ၏။ ပြောဆိုမှုနည်းလမ်းနန့် ရွီးသားမှုနည်းလမ်းဖြစ်၏။စာရွီးသားမှုအလေ့အလာ မဟိကြသူများအဖို့  ပြောဆိုမှုနည်းလမ်းကို သုံးနိုင်၏။

စကားပြောဆိုကြရာတွင် မိမိရို့ ရက္ခိုင်လူမျိုးအချင်းချင်းပြောဆိုကြရာ၌ ကိုယ့်ရက္ခိုင်စကားကိုသာ ပြောဆိုသုံးနှုန်းကြခြင်းဖြင့်လည်းကောင်း၊ မိသားစုအတွင်း သားသမီး မြီးမြစ်များ မိမိရို့ အိမ်အသီးသီးတွင် ကိုယ့်ရက္ခိုင်ဘာသာစကားကိုသာ ပြောဆိုသုံးနှုန်းကြစီပြီး မျိုးရိုးစိုင်ဆက် လက်ဆင့်ကမ်းခြင်းဖြင့်လည်းကောင်း ထိန်းသိမ်းကြအပ်ပေ၏။အင်္ဂလိပ်နန့် တွိလျှင် အင်္ဂလိပ်စကား၊ မြန်မာနန့် တွိလျှင် မြန်မာစကားပြောသည်မှာ အရေးမဟုတ်သော်လည်း မိမိရို့ ရက္ခိုင်အချင်းချင်းတွိလျှင် ရက္ခိုင်စကားကိုသာပြောဆိုကြရန်ကား အရေးဟုတ်လှချေ၏။ ယင်းကြောင့် အထူးသဖြင့် ပြည်မရောက် ရက္ခိုင်လူမျိုးများအဖို့ ဆောင်ပုဒ်တစ်ခုပင် ဖြစ်လာနီချေပြီ။ ယင်းဆောင်ပုဒ်ကား " ရက္ခိုင်လူမျိုးအချင်းချင်း ရက္ခိုင်စကားပြောခြင်းဖြင့် ဂုဏ်ယူပါ " ဟူ၍ဖြစ်၏။ဤပြောဆိုမှုနည်းလမ်းဖြင့် ထိန်းသိမ်းကြသည့်အပြင် ရက္ခိုင်အမျိုးသားစာရွီးဆရာများက မိမိရို့ ရက္ခိုင်ဘာသာစကား မပျောက်ကွယ်ရေးအတွက် ဒေနိ ရက္ခိုင်စကားပြောကိုအခြီခံသည့် ရက္ခိုင်စာပီသစ်ကိုရွီးသားယင်း ထိန်းသိမ်းနီကြ၏။ ရွီးသားမှုနည်းလမ်းဖြင့် ထိန်းသိမ်းနီကြခြင်းဖြစ်၏။

ရက္ခိုင်ဘာသာစကားနန့် ရက္ခိုင်စာပီအတွက် အရေးပါလှ၏။သို့ ရာတွင် ယင်းသို့ ရက္ခိုင်စကားပြောကိုအခြီခံပြီး ရက္ခိုင်စာပီသစ်ကိုရွီးသားနီကြရာ၌ စာလုံးပေါင်းများမတည်ငြိမ်၊ မညီညွတ်ဖြစ်နီကြသည်ကတော့ အများအပြားဖြစ်ပေါ်လျက်ဟိ၏။ တစ်ယောက်တည်းရွီးသောဆောင်းပါးတစ်ပုဒ်နန့် ပင် စာလုံးပေါင်းများ ရှိနောက်ကွဲလွဲနီကြသေး၏။ မမှားသင့်သောစာလုံးပေါင်းများပင် မှားယွင်းနီကြ၏။ အယ်ဒီတာများအဖို့ အယ်ဒီတာပီသစွာ တာဝန်ယူတည်းဖြတ်ရန် လိုအပ်နီပေ၏။ အမုန်းမခံလို၊ ပဋိပက္ခ မပွားလို၍ အမှန်အကန်မတည်းဖြတ်လျှင် အယ်ဒီတာမဟုတ်တော့ချေ။ မဂ္ဂဇင်းအယ်ဒီတာစာရင်းတွင် ပါဝင်ပြီး " ငါအယ်ဒီတာ " ဟု အမည်ခံကောင်းရုံမျှဖြစ်ပြီး၊ ရက္ခိုင်စာလုံးပေါင်းနန့် ရက္ခိုင်စာပီတည်ငြိမ်တိုးတက်ရေးကို ဖြစ်ပေါ်စီနိုင်မည်မဟုတ်ပေ။လောလောဆယ် ရက္ခိုင်စာပီသစ်ပဏာမကာလတွင် စာလုံးပေါင်းမတည်မငြိမ်ဖြစ်နီကြသေးသည်မှာ သဘာဝတော့ကျ၏။

သို့ သော်ဤပဏာမကာလသည် နှစ်ပေါင်းများစွာ ကြန့် ကြာနီသင့်သည်တော့မဟုတ်။ ဤပဏာမကာလ၌ အချင်းချင်းလုံးထွေးပတ်လည်ဖြစ်နီကြရန်လည်း မသင့်။ ဤပဏာမကာလကို ကျော်လွန်ပြီး မတည်ငြိမ်မှုကို တည်ငြိမ်မှုဖြင့် အစားထိုးနိုင်ကြရပေမည်။ အမှန်စင်စစ် စာလုံးပေါင်းသတ်ပုံ တည်ငြိမ်ညီညွတ်လာကြပြီးမှ ရက္ခိုင်စာပီ ခန့် ညားလာပေမည်။သို့ ဖြစ်ရာ ... ရက္ခိုင်စာလုံးပေါင်းတည်ငြိမ်ပြီး၊ ရက္ခိုင်စာပီတိုးတက်ရေးအတွက် ရက္ခိုင်စာရွီးဆရာများနန့် အယ်ဒီတာများသည် တက်ညီလက်ညီလှော်ခတ်လားကြသင့်၏။ ရက္ခိုင်စာလုံးပေါင်းတည်ငြိမ်ရေး၊ ရက္ခိုင်စာပီတိုးတက်ခန့် ညားလာရေးအတွက်နန့်  ပုဂ္ဂိုလ်ရေးမဖက်ဘဲ ရိုးသားသောစေတနာဖြင့် ကျွန်ုပ် ဤသို့ အကြံပြုလိုပါ၏။တစ်ယူသန်မာနမထားကြဘဲတွေးဆ၊ လက်ခံကျင့်သုံးနိုင်ကြရန်လည်း မျှော်လင့်ပါ၏။

၁။ ။တည်ငြိမ်ပြီးသား စာလုံးပေါင်းနှင့် အများလက်ခံပြီးသား စာလုံးပေါင်းကို ယင်းအတိုင်းပင် စာလုံးပေါင်းကြပါ။

ဥပမာ -ငါကား ( ငါဂါး ) မဖြစ်သင့်။
သူက ( သူဂ ) မဖြစ်သင့်။
မလာတော့ ( မလာဂေ့၊ မလာကဲ့ ) မဖြစ်သင့်။
လာကတ် ( လာဂတ်၊ လာကပ် ) မဖြစ်သင့်။
ကဗျာ ( ကပျာ ) မဖြစ်သင့်။
မြင်လာရေ ( မြင်လှာရေ ) မဖြစ်သင့်။
ငါ့မှာ ( ငါ့မာ ) မဖြစ်သင့်။မှာသည် တည်ငြိမ်ပြီးသားဖြစ်၏။
သိရေလတ် ( သိရေလပ်၊ သိရေလှပ်၊ သိရေဟတ် ) မဖြစ်သင့်။
နန့်  ( နင့်၊ နာင့် ) မဖြစ်သင့်။
လာလတ်နန်း ( လာလတ်နမ်း၊ လာလတ်နှောင်း ) မဖြစ်သင့်။
အေချင့် ( ဧယှင့်၊ ဧသျှင့် ) မဖြစ်သင့်။
ဒေချင့် ( ဒေဟင့် ) မဖြစ်သင့်။
ဟိပေ့စီ ( ဟိပတ်စီ၊ ဟိဗတ်စီ ) မဖြစ်သင့်။
ရွှီလောင်ပွန်း ( သျွေလောင်ပွန်း ) မဖြစ်သင့်။
ရွှီ ( သတ်ပုံမှန် ) ကို အသံမှန်ထွက်ကြရန်သာ ကြိုးစားသင့်၏။
ငါ့စွာ ( ငါ့စော် ) မဖြစ်သင့်။
စားဗျယ် ( စားဗျလ်၊ စားပျယ် ) မဖြစ်သင့်။
အိပ်ပနာ ( အိပ်ဗနာ၊ အိပ်ပဏာ ) မဖြစ်သင့်။
ထွေနိက ( ဟွေနိက ) မဖြစ်သင့်။
ငါ၏ ( ငါအဲ့၊ ငါယဲ့၊ ငါအယ့် ) မဖြစ်သင့်။
၂။ ။ရက္ခိုင်စကားကို အမှန်တကယ်ကိုယ်စားပြုပြီး စာလုံးပေါင်းကြပါ။

ဥပမာ -စာရွီးရေ ( စာရီးရေ ) မဖြစ်သင့်။ ' စာရီးရေ ' လို့ မပြောကြပါ။ရွီတွက်၊ ရွီရေ ( ရီတွက်၊ ရီရေ ) မဖြစ်သင့်။ ဤသို့ မပြောကြပါ။မသီးသိ ( မသီးသီး ) မဖြစ်သင့်။ ' မသီးသီး ' လို့ မပြောကြပါ။မြင်လာရေ ( မြင်လှာရေ ) မဖြစ်သင့်။ ' မြင်လှာရေ ' လို့ မပြောကြပါ။ကြပ်ကြပ်မတ်မတ် ( ကျပ်ကျပ်မတ်မတ် ) မဖြစ်သင့်။

၃။ ။ရက္ခိုင်စကားကို အမှန်တကယ်ကိုယ်စားပြုနိုင်အောင် တချို့ စာလုံးပေါင်းများကို သင့်တော်သလိုပြောင်းလဲပါ။

ဥပမာ -ကျည်တောက် ( ကျိုင်တောက် ) ( ပြောင်းသင့် )
ကျည်ပွေ့  ( ကျမွိ ) (ပြောင်းသင့် )
ကျဉ်းမြောင်း ( ကျိုင်းမြောင်း ) ( ပြောင်းသင့် )
ကျွမ်းစိုက် ( ဂျွမ်းစိုက် ) ( ပြောင်းသင့် )
ခေါင်းခဲရေ ( ဂေါင်းခဲရေ ) ( ပြောင်းသင့် )
ခေါင်းဆောင် ( ဂေါင်းဆောင် ) ( ပြောင်းသင့် )
အဘ ( အဖ ) ( ပြောင်းသင့် )
အဘိုး ( အဖိုး ) ( ပြောင်းသင့် )
ရင်ဘတ် ( ရင်ဖတ် ) ( ပြောင်းသင့် )
စနီထောင့်( စနီဒေါင့် ) ( ပြောင်းသင့် )
တုတ်( ဒုတ် ) ( ပြောင်းသင့် )
အာရှ ( အာသျှ ) ( ပြောင်းသင့် )
ဗြိတိသျှ ( ဗြိတိသျှ ) ( ပြောင်းသင့် )
ရှစ်သောင်း ( သျှစ်သောင်း ) ( ပြောင်းသင့် )
မောင်ရှင် ( မောင်သျှင် ) ( ပြောင်းသင့် )
အရှင်ဘုရား ( အသျှင်ဘုရား ) ( ပြောင်းသင့် )
ကျေးဇူးရှင် ( ကျေးဇူးသျှင် ) ( ပြောင်းသင့် )
ဆုံးရှုံး၊ ရှင်းလင်း ( ဆုံးယှုံး၊ ယှင်းလင်း ) ( ပြောင်းသင့် )
သန့် ရှင်း၊ ရှောင်ကြဉ် ( သန့် ယှင်း၊ ယှောင်ကြည် ) ( ပြောင်းသင့် )
အလျှင်း၊ ရှမ်းပြည် ( အယှင်း၊ သျှမ်းပြည် ) ( ပြောင်းသင့် )
ပစောင်၊ ပဇောင် ( ဘဇောင် ) ( ပြောင်းသင့် )
မီးရှိန် ( မီးယှိန် ) ( ပြောင်းသင့် )
လှုပ်ရှား ( လှုပ်ရှား )( သို့ သော် ' ထင်ရှား ' တွင် ' ရှား ' မှာ ရက္ခိုင်သံသီးခြား ဟိ၍ ပြောင်းရန်မလိုပါ။ )ရှူရှိုက် ( ယှူယှိုက် ) ( ပြောင်းသင့် )( သို့ သော် ' ကြည့်ရှု ' ရာတွင် ' ရှု ' မှာ ရက္ခိုင်သံ သီးခြားဟိ၍ ပြောင်းရန် မလိုပါ။ )

၎။ ။ရက္ခိုင်စကားကို ကိုယ်စားပြုသင့်သည်ဆိုသော်လည်း စကားသံအစွန်းရောက်မှုကို ယှောင်ရှားကြပါ။

သူက ( သူဂ ) မဖြစ်သင့်။
သိကေ ( သိဂေ ) မဖြစ်သင့်။
မလာကေ့ ( မလာဂေ့ ) မဖြစ်သင့်။
လာကတ် ( လာဂတ် ) မဖြစ်သင့်။
လားလီကတ်ဖိ ( လလိဂတ်ဖိ ) မဖြစ်သင့်။
စားပြန်ရေ၊ ကျိုင်ပြတ် ( စားဗြန်ရေ၊ ကျိုင်ဗြတ် ) မဖြစ်သင့်။
ကောင်းကောင်း ( ကကောင်း ) မဖြစ်သင့်။
နောင်းနောင်း ( နနောင်း ) မဖြစ်သင့်။
သင့်သင့်တင့်တင့် ( သသင့်တတင့် ) မဖြစ်သင့်။
ပြုံးပြုံးချေ ( ပပြုံးချေ ) မဖြစ်သင့်။
တက်လားခရေ ( တက်လခရေ ) မဖြစ်သင့်။
လုပ်ပစ်လိုက်တေ ( လုပ်ကလိုက်တေ ) မဖြစ်သင့်။
ယေကေ၊ ယေဇူးနန့်  ( ယကေ၊ ယဇူးနန့်  ) မဖြစ်သင့်။
ယင်းချင့်၊ ယင်းပိုင် ( ယချင့်၊ ယပိုင် ) မဖြစ်သင့်။
ငါ့ပါးကို ( ငါ့ဗားကို၊ ငါ့ဘားကို၊ ငါ့ဘက်ကို ) မဖြစ်သင့်။
အဂေါင့် ( အဂင့် ) မဖြစ်သင့်။ခေတ်သစ် ( ခိုက်သစ် ) မဖြစ်သင့်။
သေတ္တာ ( တစ်တာ၊ သိုက်တာ ) မဖြစ်သင့်။
ခါးတောင်းကျိုက် ( ခဒေါင်းကျိတ် ) မဖြစ်သင့်။
ခါးကြိုး ( ခကြိုး ) မဖြစ်သင့်။
ခါးစောင်း ( ခဇောင်း ) မဖြစ်သင့်။
နီရာ၊ နားရွက် ( နရာ၊ နရွက် ) မဖြစ်သင့်။
နှာခေါင်း၊ နားတောင်း ( နခေါင်း၊ နတောင်း ) မဖြစ်သင့်။
ငါရို့ ၊ အတူတူ ( ငရို့ ၊ အတူဒူ ) မဖြစ်သင့်။
စိကေ၊ ကစပ်၊ ပစပ် ( စကေ၊ ကဇပ်၊ ပစပ် ) မဖြစ်သင့်၊၊
စားခီ၊ ဇီးယို ( စစီ၊ ဇယို ) မဖြစ်သင့်။
ပုစွန်၊ ပုဝါ ( ပဇွန်၊ ပဝါ ) မဖြစ်သင့်။
စာတီ ( ဇာတီ ) မဖြစ်သင့်။
အားရပါးရ ( အားရဗရ ) မဖြစ်သင့်။
မင်းကိုတော့ခါ ( မင်းကိုဒေါ့ခါ ) မဖြစ်သင့်။
ဇာနှစ်နှစ်လဲ ( ဇာနှနှစ်လဲ ) မဖြစ်သင့်။
ဇာမဟုတ်စွာ ( ဇာမဟောက်စွာ ) မဖြစ်သင့်။
ဖားပြုတ် ( ဖပြုတ် ) မဖြစ်သင့်။
ပြောင်းပြန် ( ဗြောင်းဗြန် ) မဖြစ်သင့်။
မသိကာ ( မသိဂါ ) မဖြစ်သင့်။
စွဲစွဲမြဲမြဲ ( စဇွဲမမြဲ ) မဖြစ်သင့်။

၅။ ။နာသိကသံ၌ သတ်ပုံမှန်ကြပါ။

စနီနိ ( စနိန်နိန့်  ) မဖြစ်သင့်။
ရွီးနီရေ ( ရွီးနိန်ရေ ) မဖြစ်သင့်။
နီရာ ( နိန်ရာ ) မဖြစ်သင့်။
နိဒါန်း ( နိန့် ဒါန်း ) မဖြစ်သင့်။
ညီညွတ် ( ညိန်ညွတ် ) မဖြစ်သင့်။
အောက်မိရေ ( အောက်မိမ့်ရေ ) မဖြစ်သင့်။
အနီအထား ( အနိန်အထား ) မဖြစ်သင့်။
မီးမြန်း ( မိန်းမြန်း ) မဖြစ်သင့်။
အမိ၊ အမှီ ( အမိန့် ၊ အမှိန် ) မဖြစ်သင့်။
မွီးရာပါ၊ မြီပြင် ( မှိန်းရာပါ၊ မြိန်ပြင် ) မဖြစ်သင့်။
မလာသိ ( မလာသိန့် ၊ မလာသိမ့် ) မဖြစ်သင့်။
ကြက်သီးထ ( ကြက်သိန်းထ ) မဖြစ်သင့်။
ဟိရေ၊ လက်ဟိ ( ဟိန့် ရေ၊ လက်ဟိန့်  ) မဖြစ်သင့်။
ငြိရေ ( ငြိန့် ရေ ) မဖြစ်သင့်။
ညီးရေ ( ညိန်းရေ ) မဖြစ်သင့်။

၆။ ။အစွန်းရောက်သတ်ပုံကို ရှောင်ကြပါ။

ငါရို့  ( ငြို့  ) မဖြစ်သင့်။
အေချင့် ( ဧယှင့်၊ ဧသျှင့် ) မဖြစ်သင့်။
အားလုံး ( အားနုံး၊ အားနူး ) မဖြစ်သင့်။
ဟောရေ ( ဝှေါရေ ) မဖြစ်သင့်။
ရှောက်သီး ( ပြောက်သီး ) မဖြစ်သင့်။ ( ရက္ခိုင်မှာ ' ရှ ' သံပီပြီးသားဖြစ်၏။ )
ရှင်သန် ( ဟြင်သန် ) မဖြစ်သင့်။ ( ရက္ခိုင်မှာ ' ရှ ' သံပီပြီးသားဖြစ်၏။ )
ထင်ရှား ( ထင်ဟြား ) မဖြစ်သင့်။ ( ရက္ခိုင်မှာ ' ရှ ' သံပီပြီးသားဖြစ်၏။ )
ကြည့်ရှု ( ကြေ့ ရှု၊ ကြည့်ဟြု ) မဖြစ်သင့်။ ( ရက္ခိုင်မှာ ' ရှ ' သံပီပြီးသားဖြစ်၏။ )
ရှားဂြို ( ဟြားဂြို ) မဖြစ်သင့်။ ( ရက္ခိုင်မှာ ' ရှ ' သံပီပြီးသားဖြစ်၏။ )
ရှားစီး ( ဟြားစီး ) မဖြစ်သင့်။ ( ရက္ခိုင်မှာ ' ရှ ' သံပီပြီးသားဖြစ်၏။ )
သိရေမလား ( သိရေမနား ) မဖြစ်သင့်။
ဖြစ်ထွန်း ( ဗြိုက်ထွန်း ) မဖြစ်သင့်။
စစ်တွေ ( စိုက်တွယ် ) မဖြစ်သင့်။
ကိုင်တွယ်၊ လူငယ် ( ကိုင်တွေ၊ လူငေ ) မဖြစ်သင့်။
ဆက်သွယ်၊ သွယ်တန်း ( ဆက်သွေ၊ သွေတန်း ) မဖြစ်သင့်။
တည်ဟိ၊ အကြပ်အတည်း ( တေဟိ၊ အကြပ်အတေး ) မဖြစ်သင့်။
အဖွဲ့ အစည်း၊ အစည်းအဝေး ( အဖွဲ့ အစေး၊ အစေးအဝေး ) မဖြစ်သင့်။
ပစ္စည်း၊ အရည်အခြင်း ( ပစ္စေး၊ အရေအခြင်း ) မဖြစ်သင့်။
လူတန်းစား၊ ကျန်းမာပါစီ ( လူတန်းဇား၊ ကျန်းမာပါဇီ ) မဖြစ်သင့်။
တိုင်ပင်၊ မသိဘဲ ( တိုင်ဗင်၊ မသိဗဲ ) မဖြစ်သင့်။
ဘူးသီး၊ ကျောက်လှီကား ( ဘသီး၊ ကျောက်လှဂါး ) မဖြစ်သင့်။
လာပြန်ရေ၊ လယ်ပြင် ( လာဗြန်ရေ၊ လယ်ဗြင် ) မဖြစ်သင့်။

၇။ ။လောင်းရိပ်မိသတ်ပုံကို ရှောင်ပါ။

ကိုင် ( ကဲ ) မဖြစ်သင့်။
အေး ( အဲ ) မဖြစ်သင့်။
အဂု ( အခု ) မဖြစ်သင့်။
အင်း ( အိင်၊ အိင်း ) မဖြစ်သင့်။
လုံးရွီ ( လုံးရီ ) မဖြစ်သင့်။
ငါလည်းဝမ်းနည်း ( ငါလဲဝမ်းနဲ ) မဖြစ်သင့်။
ဇာလိုချင်လဲ ( ဇာလိုချင်လည်း ) မဖြစ်သင့်။
တည်ထွင်၊ ကြိတ်မှန်ရွက် ( တီထွင်၊ ကျိတ်မှန်ရွက် ) မဖြစ်သင့်။
နက်ဖြန်၊ အယင်က ( နက်ဖန်၊ အရင်က ) မဖြစ်သင့်။
ကြပ်ခိုး၊ ကြောရိုး ( ကျပ်ခိုး၊ ကျောရိုး ) မဖြစ်သင့်။
ကြက်သရေ၊ မျက်နှာကြက် ( ကျက်သရေ၊ မျက်နှာကျက် ) မဖြစ်သင့်။
ခြောင်းဆိုး၊ လိုင်ခြောင်း ( ချောင်းဆိုး၊ လည်ချောင်း ) မဖြစ်သင့်။
အိမ်မျှောင်၊ အင်တန် ( အိမ်မြှေင်၊ အင်မတန် ) မဖြစ်သင့်။
ဟိရေ၊ အရှိဖက် ( ယှိရေ၊ အယှိဖက် ) မဖြစ်သင့်။
အပျင်းခို ( အပယင်းခို ) မဖြစ်သင့်။
အရည်အခြင်း ( အရည်အချင်း ) မဖြစ်သင့်။
ရုပ်ထု ( ရုပ်တု ) မဖြစ်သင့်။
သူ့ ခမာ ( သူ့ ခမျာ ) မဖြစ်သင့်။
သက်ဆိုးရှည် ( သက်ဇိုးရှည် ) မဖြစ်သင့်။
လားယူခြီ ( လားယူခီ ) မဖြစ်သင့်။ ( ' သွားယူချေ ' ကိုဘာသာပြန်ခြင်းဖြစ်၏။ )
ခွဲပီးပါမေ ( ခွဲပီးပါ့မယ် ) မဖြစ်သင့်။

၈။ ။တရားသေအယူအဆကို ရှောင်ပါ။

အဖြေ၊ သေချာ၊ ရေရာ ( အဖြီ၊ သီချာ၊ ရီရာ ) မဖြစ်သင့်။
ရိုသေ၊ ပြေပြစ် ( ရိုသီ၊ ပြီပြစ် ) မဖြစ်သင့်။
တွေးတော၊ ကွေ့ ကောက် ( တွီးတော၊ ကွိကောက် ) မဖြစ်သင့်။
ပြည်ပန်းညို၊ ဇောချွေး ( ပြီပန်းညို၊ ဇောချွီး ) မဖြစ်သင့်။
အရေးကြီးရေ ( အရီးကြီးရေ ) မဖြစ်သင့်။
အထွေထွေ၊ ဖွေးဖွေးဖြူ ( အထွီထွီ၊ ဖွီးဖွီးဖြူ ) မဖြစ်သင့်။
အေနိ၊ ပျော်မွိ၊ တွိကြုံ ( ဧနိ့ ၊ ပျော်မွိ့ ၊ တွိ့ ကြုံ ) မဖြစ်သင့်။
ရသေ့၊ ခြင်္သေ့ ( ရသိ၊ ခြင်္သိ ) မဖြစ်သင့်။
ဗရဗရေ ( ဗရဗရီ ) မဖြစ်သင့်။သီးသီးရေ ( သီးသိရေ ) မဖြစ်သင့်။

၉။ ။ခေတ်နောက်ပြန်ဆွဲသတ်ပုံကို ရှောင်ပါ။

ဆရာ ( ဆြာ ) မဖြစ်သင့်။
လားကတ်တေ၊ လတ်တလော ( လားကတ္တေ၊ လတ္တလော ) မဖြစ်သင့်။
ငါ့ပါးက ( ငါ့ဗက္က ) မဖြစ်သင့်။
ဆုံးမ ( ဆုမ္မ ) မဖြစ်သင့်။
ဦးဝါယမ ( ဥူးဝါယမ ) မဖြစ်သင့်။
ရခိုင်မြီ၌ ( ရခိုင်မြီနှိုက် ) မဖြစ်သင့်။
မိမ ( မိမ္မ ) မဖြစ်သင့်။

၁၀။ ။မမှားသင့်သောသတ်ပုံကို မမှားပါစီနှင့်။

ကတိပီး ( ဂတိပီး ) မဖြစ်သင့်။
သာကီဝင် ( သာဂီဝင် ) မဖြစ်သင့်။
ကန္တာရ ( ဂန္တာရ ) မဖြစ်သင့်။
ကန်ဘောင် ( ကံဘောင် ) မဖြစ်သင့်။
ကျပ်တည်း ( ကျတ်တည်း ) မဖြစ်သင့်။
ကမ်းထောင့် ( ကမ်းထောင်း ) မဖြစ်သင့်။
ကျင်းပ ( ကျင့်ပ ) မဖြစ်သင့်။
လျှို့ ဝှက် ( ချို့ ဝှက် ) မဖြစ်သင့်။
လျှော့ပေါ့ ( ချော့ပေါ့ ) မဖြစ်သင့်။
နာမည် ( နာမေ ) မဖြစ်သင့်။
ဘယ်ခြီဘယ်လက် ( ဘေခြီဘေလက် ) မဖြစ်သင့်။
ဟရေ ( ဟှရေ ) မဖြစ်သင့်။
အနာထပိဏ် ( အနာထာပိဏ် ) မဖြစ်သင့်။
ဥပုသ် ( ဥပုဒ် ) မဖြစ်သင့်။
ငုပ်လျှိုး ( ငုတ်လျှိုး ) မဖြစ်သင့်။
ဈီးသည် ( ဈီးသယ် ) မဖြစ်သင့်။
ပိုက်သည်ရပ် ( ပိုက်သယ်ရပ် ) မဖြစ်သင့်။
ဗျည်း ( ဗျဉ်း ) မဖြစ်သင့်။
နန်းရာကုန်း ( နန့် ရာကုန်း ) မဖြစ်သင့်။
မြောက်ဦး ( မြောက်ဥ ) မဖြစ်သင့်။
မြင်သရွိ ( မြင်သရိ ) မဖြစ်သင့်။
ယေဘုယျ ( ယေဘူယ ) မဖြစ်သင့်။
လှိုင်းဂယက် ( လှိုင်းကယက် ) မဖြစ်သင့်။
လိုဏ်ဂူ ( လှိုင်ဂူ ) မဖြစ်သင့်။
ဝေးပစ် ( ဝဲပစ် ) မဖြစ်သင့်။
သဘော ( သဗော ) မဖြစ်သင့်။
သင်္ဘော ( သင်းဘော ) မဖြစ်သင့်။
သင်္ကြန် ( သင်းကြန် ) မဖြစ်သင့်။
သန်မာ ( သံမာ ) မဖြစ်သင့်။
အသည်း၊ သည်းခံ ( အသဲ၊ သဲခံ ) မဖြစ်သင့်။
လောင်းမြှပ်တေ ( လောင်းမြုတ်တေ ) မဖြစ်သင့်။
ဦးသျှောင် ( ဥသျှောင် ) မဖြစ်သင့်။

၁၁။ ။အခက်ထက် အလွယ်ကို ရနိုင်သမျှ ဦးစားပီးပါ။

ကလေချေ ( ကလေသျှေ ) မဖြစ်သင့်။
မောင်ချေ ( မောင်သျှေ ) မဖြစ်သင့်။
အခင်ချေ ( အခင်သျှေ ) မဖြစ်သင့်။
အချေ ( အသျှေ ) မဖြစ်သင့်။
ယင်းချင့် ( ယင်းသျှင့် ) မဖြစ်သင့်။
ချောင်ရေ ( သျှောင်ရေ ) မဖြစ်သင့်။
ချချားသီး ( သျှသျှားသီး၊ သျှီသျှားသီး၊ သျှစ်သျှားသီး ) မဖြစ်သင့်။
ပန်းချားပွင့် ( ပန်းသျှားပွင့် ) မဖြစ်သင့်။
တိုးချိတိုးချို ( တိုးသျှိတိုးသျှို ) မဖြစ်သင့်။
ငပိချာ ( ငပိသျှာ ) မဖြစ်သင့်။
မယားချာ ( မယားသျှာ ) မဖြစ်သင့်။

၁၂။ ။အဆန်းထွင်မှုမလွန်ကဲပါနှင့်။

ဂျင်လိပ် ( ဇင်လိပ် ) မဖြစ်သင့်။
ငါ၏ ( ငါအဲ့၊ ငါအယ့်၊ ငါဧဲ့ ) မဖြစ်သင့်။
ထင်ရှား ( ထင်သျှား ) မဖြစ်သင့်။
လာဖို့ မလား ( လာဖို့ မနား ) မဖြစ်သင့်။
ထိုနိက ( ဟွေနိက ) မဖြစ်သင့်။
သိရေလတ် ( သိရေဟတ်၊ သိရေလှပ် ) မဖြစ်သင့်။
တခါလောက် ( တစ်ခါလှောက် ) မဖြစ်သင့်။
နှစ်သက် ( နှိပ်သက် ) မဖြစ်သင့်။
ပြည့်မှရာ ( ပြည့်မာ့ရာ ) မဖြစ်သင့်။
နပျိုးဖက် ( နတ်ပျိုးဖက် ) မဖြစ်သင့်။
ဒေချင့် ( ဒေဟင့် ) မဖြစ်သင့်။
တံခါး ( တန်ခါး ) မဖြစ်သင့်။
ယှဉ်ပြိုင် ( ယှိဉ်ပြိုင် ) မဖြစ်သင့်။
မအ,အောင် ( မအာ့အောင် ) မဖြစ်သင့်။
မိမ ( မမာ့ ) မဖြစ်သင့်။
ဝီးရေ ( ဝွီးရေ ) မဖြစ်သင့်။

၁၃။ ။ပါဠိကို ပါဠိသဘောမပျက်ပါစီနှင့်။

ပညာ ( ပိုင်ညာ ) မဖြစ်သင့်။
အဓမ္မ ( အားဓမ ) မဖြစ်သင့်။
( စိုင်းစား၊ အစိုင်အလာ၊ ယိုင်ကျေး၊ ချိုင်ပေါင်၊ ကြိုးချိုင်ရေ ) မှာတော့ ပါဠိနှင့်မဆိုင်၍ သံမှန်ဖြစ်အောင် ဤသို့ ပင် ပြောင်းရွီးသင့်ကြပါသည်။

..................

သန္တာမောင်မောင်


မှတ်ချက်။ ။ ဤဆောင်းပါးပါ ဖော်ပြချက်များသည် ဆောင်းပါးရှင်၏ အာဘော်များသာ ဖြစ်ပါသည်။စာတည်းအဖွဲ့ ဤစာကို အောင်တံခွန်ဝံသရက္ခိတ မဂ္ဂဇင်း၊ အတွဲ ( ၁ )၊ အမှတ် ( ၃ )၊ ၂၀၀၈၊ ဇန်နဝါရီလ ထုတ်မှ ကူးယူဖော်ပြပါသည် ။ရက္ခိုင့်စာပီ တိုးတက်ထွန်းကားပါစီ။

http://zinyaw17.blogspot.com/2009/05/blog-post_02.html

စာပီမြင့်မှ လူမျိုးမြင့်ဖို့

ရခိုင်သားတိဆွေးနွေးတိုင်းမှာ ပါနီလိုဘာရာ ဇာဖြစ်လိုလေးဆိုကေ “စာပီမြင့်မှလူမျိုးမြင့်မည်”စကားသည် ကဂေါင်းမှန်ပါရေ။ ယကေလဲ့ ဒေအချက်ချေတိကို ကြည့်လိုက်တေခါ ကျနော်အမြင်က သုံးခုတွိနီပါရေ။

(၁)အချက်က- ရခိုင်သတင်းစာတိ/မီဒီယာသမားတိ ရခိုင်ပိုင်အသံထွက်အောင်ရွီးစော်ကို မြင်လည်းမမြင်ရပါ။ တွိလည်းမတွိရပါ။

(၂)အချက်က- ရခိုင်နိုင်ငံရေး သမားတိ ရခိုင်အဖွဲ့အစည်းတိ ရွီးနီရေ ထုက်ပြန်ချက်တိမှာတွိနီပါရေ။ လုံးဝရခိုင်ရွီးလို မပါ ပါ။ တွိလဲ့မတွိရပါ။ မြင်လည်းမမြင်ရပါ။ အေအချက်ချေတိစွာ “စာပီမြင့်မှလူမျုိးမြင့်ရမည်”ဆိုရေ စကားနန့်လုံဝတခြားစီဖြစ်နီပါရေ။

(၃)အချက်က- ရခိုင်သားတိုင်း ရခိုင်စာကို ရအောင်ရွီးစီချင်ပါရေ။ မဖြစ်ကေ ဖြစ်တေနည်းနန့် သင်ယူပို့ချစီချင်ပါရေ။
ယင်းပြီးမှရာ အထက်မှာပြောနီရေ “စာပီမြင့်မှလူမျိုးမြင့်မည်” ဆိုရေစကားနန့် ညီပါဖ့လိုို့ထင်ပါရေ။

မဟုတ်ကေ ဒေါခါ “စာပီမြင့်မှလူမျုိးမြင့်မည်” ဆိုပြီးးကေဗမာစာနန့် ရွီးနီလို့ကဒေါခါ ကဂေါင်းမျက်နှာပူစရာဖြစ်နီပါရေ။ ရှက်ဖိုလည်းကောင်းပါရေ။ ယင်းပိုင်ရွီးပြီးကေ ယင်းပိုင်ပြောနီစွာရေ ဗမာစာကိုမြှင့်တင်နီစွာနန့် တတူဖြစ်နီပါရေ။ နောက်ဆုံးအဆင့်ပြောရကေ ယင်းစာကြောင်းရေ ရခိုင်လူမျိုးနှင့် လုံးဝကိုတခုလည်းမသက်ဆိုင်ဖြစ်နီပါရေ ။ စာပီမြင့်မှလူမျုိးမြင့်မည်ရခိုင်သူ/သားများ။

အေကိစ္စကစိတ်ဝင်စားဖို့ ကောင်းရေပိုင် မဖြစ်မနိန်ဆွေးနွေးသင့်ရေ ဂေါင်းစဉ်တစ်ခုလို့ ထင်ရေ။ ဖြစ်နိုင်ကေ ရခိုင်နိုင်ငံရေးပါတီအဖွဲ့ အစည်းမီဒီယာတိမှာ လုပ်နိန်ကတ်တေ တာဝန်ဟိပုဂ္ဂိုလ်တိကို ဖိတ်ခေါ်ပနာ ထဲထဲဝင်ဝင်ဆွေးနွေးသင့်ရေ။ ရခိုင်အဖွဲ့ အစည်းတိဖြစ်ပြီးကေ ရခိုင်သားတိအတွက်အလုပ်လုပ်နိန်ကတ်လို့ပင် ဇာဖြစ်လို့  ရခိုင်စာကို မရွီးကတ်စွာလဲ။ ဒေပိုင် ရခိုင်စာကို အလေးမထားမရွီးကတ်ခြင်း၏အကျိုးအပြစ်တိက ဇာချင့်လဲ။ သေသေချာချာလေ့လာသုံးသပ်ပနာ တိုင်ပင်ညှိနှိုင်း ပြုပြင်ပြောင်းလဲမှုလုပ်ကတ်ရဖို့ အချိန်ကိုရောက်ပါလတ်တေ။

ရခိုင်ရို့ စာပီကို ရခိုင်နိုင်ငံရေးပါတီအဖွဲ့ အစည်းမီဒီယာတိက တန်ဖိုးမထား မြှင့်တင်လားရကောင်းမှန်းမသိကေ ရခိုင်တိဆုံးယှုံးနိန်ရေ နိုင်ငံရေးအခွင့်အရေး၊ စီးပွါးရေးအခွင့်အရေး၊ ပညာရေးအခွင့်အရေး.. စရေ အခွင့်အရေးပေါင်းစုံကို အေထက်မက ဆုံးယှုံးပနာ နောက်ဆုံးမှာ ကျွန်ဘ၀နန့် မျိုးတုံးလားနိုင်ရေလို့ ထင်ရေ။

ပြည်ထဲပြည်ပမှာ ဟိကတ်တေ ရခိုင်မျိုးဆက်သစ်အချေတိက နည်းလမ်းပေါင်းစုံနန့် ရခိုင်စာပီတိုးတက်ဖွံ့ ဖြိုးလာရေးကို ဇောင်းပီးလုပ်ဆောင်နိန်ကတ်တေ အချိန်မှာ လွတ်မြောက်နယ်မြီမှာဟိရေ ရခိုင်နိုင်ငံရေးတော်လှန်ရေးပါတီအဖွဲ့ အစည်း သတင်းဌါနတိက ရခိုင်စာကို လစ်လျူရှုပယ်လျကန်ပြုဖို့ ကြိုးစားနိန်ကတ်ကေ ရခိုင်ပင်မလူထု၏ယုံကြည်မှုကို မျက်ကွယ်ပြုလိုက်ခြင်းဖြစ်ပနာ ဒေအဖွဲ့ အစည်းတိစွာ ရခိုင်လူထုနန့် ရာသက်ပန် ကင်းကွာလားနိုင်ရေ။

လုပ်သင့်စွာက ရခိုင်စာပီကိုတန်ဖိုးထားရေ မျိုးဆက်သစ်လူငယ်ချေတိက အေထက်မက ရခိုင်စာကိုရွီးသားလာကတ်ပြီးကေ ရခိုင်စာပီဖွံ့ ဖြိုးရေးအသင်းအဖွဲ့ တိ ထူထောင်ပနာ ရခိုင်ပိုင်မရွီးရေ ရခိုင်နိုင်ငံရေးပါတီအဖွဲ့ အစည်းမီဒီယာတိကို ရခိုင်စာရွီးကတ်
ဖို့ ဖိအားပီးတိုက်တွန်းလားကတ်ရပါဖို့ ။

ရခိုင့်စာပီကို တန်ဖိုးမထားစွာရေ ရခိုင့်အမျိုးသားနိုင်ငံရေးကို သစ္စာဖောက်နီစွာဖြစ်တေ။ ရခိုင်သားတိုင်း အမျိုးသားစာပီကို တန်ဖိုးထားနိုင်ကတ်ပါစီ။

ရခိုင်တိအားလုံးကို Forward လုပ်ပီးကတ်ပါ။
..................


မှတ်ချက်။ ။ ArakaneseLiterature ဆိုရေ လူတယောက်ကပို့လိုက်ရေ မေးကို ရခိုင်သားတိအတွက် အမှန်စဉ်းစာသင့်ရေ ဖော်ပြချက်ချေတခုဖြစ်လို့ Today Arakan Blog “ရခိုင်စာပီကဏ္ဍ” မှာ ပြန်လို့တင်ပီးလိုက်ပါရေ။

အက္ခရာ (နှင့်) စာ

ရခိုင်အများစုမှာ စာ (နှင့်) အက္ခရာကို မကွဲပါ။ အက္ခရာဆိုသည်မှာ အင်္ဂလိပ်ဝေါဟာရအားဖြင့် (Alphabet) ကို ဆိုလိုပါသည်။ စာဆိုသည်မှာ (Literature) ကို ဆိုလိုပါသည်။

ဥပမာ။ ။ စပိန်နှင့် အင်္ဂလိပ်စာမှာ အက္ခရာ (Alphabet) အတူတူပင်ဖြစ်သည်။ အက္ခရာ (Alphabet) တူသဖြင့် အင်္ဂလိပ်စာနှင့် စပိန်စာမှာ အတူတူဖြစ်သည်ဟုဆို၍ မဖြစ်နိုင်ပါ။

ထိုနည်းတူစွာ မြန်မာစာနှင့် ရခိုင်စာမှာ (Alphabet) အက္ခရာ အတူတူပင်ဖြစ်ပါသည်။ သို့သော် ရခိုင်စကားဖြင့်ရွီးလျှင် ရခိုင်စာဖြစ်ပြီး မြန်မာ (ဗမာ) စကားဖြင့်ရွီးလျှင် မြန်မာစာဖြစ်ပါသည်။

ဥပမာ။ ။ မိုးမိုးအင်းလျှား၊ မောင်စိန်ဝင်းပုတီးကုန်း၊ ဂျူးအစဟိသဖြင့် မြန်မာစာရွီးဆရာများရွီးသော ၀တ္ထုများမှာ မြန်မာစကားဖြင့်ရွီးသဖြင့် မြန်မာစာဖြစ်ပါသည်။

ဥပမာ။ ။ (ဘယ်သွားမလဲ။ နေကောင်းရဲ့လား။ သိပ်သတိရတယ်) စသဖြင့် မြန်မာစကားဖြင့်ရွီးထားသောစာကိုပင် ရခိုင်စာဟု ရခိုင်များက အထင်ရောက်နီပါသည်။ ကကောင်းရှက်ဖို့ကောင်းပါသည်။ ရခိုင်စာဟုအသျှင်ခံချင်လျှင် (ဇာလားပါလဲ၊ နီကောင်းပါယင့်လား၊ ကကောင်းသတိရပါရေ) စသည်ဖြင့် ကိုယ့်ရခိုင်စကားဖြင့် ရွီးကတ်ရဖို့မဟုတ်ပါလား။ ၄င်းကို မျိုးချစ်ပါသည်ဆိုသော သီးခြားလွတ်လပ်ရေး ကယ်တင်သျှင်ကြီးများကိုဘေးဖယ်ထားလိုက်၊ အေနိနက်ဖန်မွီးရေ သူငယ်တန်းအချေများတောင်က မပြောပြဘဲ သဘောပေါက်နိုင်ပါသည်။

မြန်မာစကားဖြင့်ရွီးလျှင် ဥပမာ။ ။ ရခိုင်သားပင်ဖြစ်သော်လည်း ရခိုင်စာမဟုတ်ပါ။ မြန်မာစာရာဖြစ်ပါသည်။ ဥပမာ။ ။ ဖိုးကျော့ရွီးသော ၀တ္ထုတိုများမှာ အလွန်ရသမြောက်ပါသည်။ ကောင်းမွန်ပါသည်။ သို့သော် ကျောက်ဖြူရမ်းဗြဲရခိုင်စကားဖြင့်မရွီးဘဲ ရိုးတောင်တဖက်က မျိုးခြားမြန်မာစကားဖြင့်ရွီးသဖြင့် ၄င်းစာပီများမှာ မြန်မာစာများဖြစ်ပါသည်။

ဥပမာ။ ။ ဆရာကြီးစံသာအောင်သည် (Ancient Arts of Arakan) စာအုပ်ကို အင်္ဂလိပ်ဘာသာဖြင့်ရွီးပါသည်။ ရခိုင်သားရွီးသဖြင့် (အင်္ဂလိပ်စာ) ကိုပင် (ရခိုင်စာ) ဟုအသျှင်ခံပါက သင့်ကိုလူအများရယ်ခြင်းပြုပါလိမ့်မည်။ စကေတပွေ အရှက်ဟိစီချင်ပါသည်။

ရခိုင်မဂ္ဂဇိန်းများ၌ မြန်မာဝတ္ထု မြန်မာကဗျာများကိုပင် ရခိုင်ဝတ္ထု ရခိုင်ကဗျာများဟု နာမည်ကင်းပွန်းပီးထားပါသည်။ ရခိုင်မဂ္ဂဇင်း ငွေရတုအထူး စာမျှက်နှာ (၁၀ရ) တွင် ဖိုးကျော့ရွီးသော ၀တ္ထုတပုဒ်ပါလာပါသည်။ ဇာတ်ဝင်ခန်းတွင် ဇတ်ကောင်စကားပြောသည်ကို စာလုံးကျားနှင့် ရွီးထားပါသည်။
(ဈေးရောင်းဖော်ရောင်းဖက် ဈေးသည်များကလည်း တဥဥနဲ့ ဒီလောက်တောင်ချစ်နေရှာတယ်။ ကိုလှရွှေကြီးခမျာ ကြိုက်မရှက် ဖြစ်နေရှာတယ်)။ အေချင့်ကို ဘဇောင်ပျင်လို့ ရခိုင်စာလို့ဆိုပါဖို့။

ဆရာဖိုးကျော့သည် ကျောက်ဖြူသားဖြစ်ပါသည်။ ကျောက်ဖြူသားဗမာစကားမပြောပါ။ ကျောက်ဖြူသားရခိုင်ရမ်းဗြဲစကားပြောပါသည်။ ထိုကြောင့် ၄င်းစာမှာ ရခိုင်စာမဟုတ်ပါ။ ဗမာစာဖြစ်ပါသည်။ ရခိုင်စာဖြစ်ချင်လျှင်

(ဈီးရောင်းဖော်ရောင်းဖက် ဈီးသည်တိကလည်း တဥဥနန့် ကကောင်းချစ်နီဗျာ။ ကိုလှရွှေတယောက် ကြိုက်မရှက် ချစ်မရှက်ဖြစ်နီဗျာ)

စသဖြင့် ကိုယ့်စကားဖြင့် ရွီးကတ်ရဖို့မဟုတ်ပါလား။

ရခိုင်ကဗျာခေါင်းစဉ်အောက်မှာ မြန်မာကဗျာများကို တွိရပါသည်။ မင်းပြားမောင်ယုနွယ်ရွီးသော ဗမာကဗျာဖြစ်ပါသည်။ မင်းပြားသား ဗမာစကားမပြောသည်ကို လူတိုင်းသိပါသည်။ အောက်တွင် ရခိုင်ဘာသာပြန်ဖြစ်ပါသည်။

သမိုင်း (နှင့်) လူ

(တစ်)
လောကမှာ
ကဗျာရွီးဖို့
အမင် မွီးပီးခရေ ငါ --။

(နှစ်)
ယုံကြည်ချက်
ခံယူချက်တွက်
အသက်သီဖို့ မကြောက်တေ ငါ --။

(သုံး)
ကာလသန်းခေါင်
အမှောင်ထုအောက်
ထိုးဖောက်ရုန်းကန်
ရှင်သန်ထမြောက်
ပန်းတိုင်ရောက်အောင်လားဖို့ ငါ --။

(လေး)
ကဗျာတပုဒ်
စာတအုပ်
ကိုင်ဆုပ်ဖက်လျှက် သွီးအသက်လေ
ချေဂွေဗားရား ဖူးချစ်အားပ
တရားတဖက် ဓါးတလက်နန့်
နက်ဖန်များစွာ မဟာအနာဂါတ်
မြင့်မြတ်သည့်လမ်း ခရီးကြမ်းကို
ဖြတ်သန်းဝံ့ရဲ လျှေက်မြဲငါ --။

(မင်းပြားမောင်ယုနွယ်)
ရခိုင်မဂ္ဂဇိန်းအမှတ် (၂၅) စာမျှက်နှာ (၂၀)

မြန်မာသာသာမူရင်းကို အောက်တွင်ဖတ်ကြည့်ပါ။

သမိုင်းနှင့်လူ (၃)

(တစ်)
လောကမှာ
ကဗျာရေးဖို့
အမေမွေးပေးခဲ့တဲ့ ငါ --။

(နှစ်)
ယုံကြည်ချက်
ခံယူချက်အတွက်
အသက်သေမှာ မကြောက်တဲ့ ငါ --။

(သုံး)
ကာလသန်းခေါင်
အမှောင်ထုအောက်
ထိုးဖောက်ရုန်းကန်
ပန်းတိုင်ရောက်အောင်သွားမဲ့ ငါ --။

(လေး)
ကဗျာတပုဒ်
စာတစ်အုပ်
ကိုင်ဆုပ်ပွေ့ဖက် သွေးအသက်လေ
ချေဂွေဗားရား ဖူးချစ်အာပေါ့
တရားတစ်ဖက် ဓါးတလက်နဲ့
နက်ဖြန်များစွာ မဟာအနာဂတ်
မြင့်မြတ်သည့်လမ်း ခရီးကြမ်းကို
လှမ်းလျှောက်ဝံ့ဆဲဖြတ်ဆဲ ငါ --။

(မင်းပြားမောင်ယုနွယ်)
ရခိုင်မဂ္ဂဇင်းအမှတ် (၂၅) စာမျှက်နှာ (၂၀)

အေကဗျာကို ဘဇောင်ပျင်လို့ ရခိုင်ကဗျာဆိုပါရေလဲ။ အရှက်မဟိ အသရေမဟိ ဘဇောင် အာရီယံမျိုးတိလဲ။ ခွီးပုတ်လောက်ကျ အံဖို့ကောင်း၏။
ဆရာကြီးသျှင်အုံးရွီးရေ (ကြက်ခြီနန့် ခွန်းချိတ်) နှင့် စစ်တွေညိုသန့်၏ (ဇတ်ဝင်ခန်း) ကဗျာနှစ်ပုဒ်ရာ ရခိုင်ကဗျာဖြစ်ပါသည်။ ၄င်းကဗျာများကို ဤနီရာမှာပင် ဖော်ပြပီးလိုက်ပါသည်။

ကြက်ခြီ (နန့်) ခွန်း

အမှားကြက်ခြီ
အမှန်ခွန်းချိတ်
နိမိတ်လက္ခဏာ
ဆရာရို့က
ဖော်ညွှန်းပြ၏ --။

ကြက်ခြီနန့် ခွန်းချိန်
နိမိတ်သင်္ဂေတ
အမှတ်ပြရန် ---။

ကမ္ဘာ့သမိုင်း
အခန်းတိုင်းမှာ
အရိုင်းနန့်အယဉ်
အယဉ်နန့်အရိုင်း
နှိုင်းယှဉ်တင်ပြ
မုသ၀ါဒ
ဘက်မကျဖို့ --။

မျဉ်းချဆွဲတန်း
သစ္စာလမ်းကို
မျှော်မှန်းကြသော်
တွေးခေါ်ဖြန့်ကား
အမှားဆုံးပြီးအမှန်
အမှန်ဆုံးသော အမှား
ခွဲခြားကြည်လင်
မြင်ပါဖို့ --။

(သျှင်အုန်း)

ဇာတ်ဝင်ခန်း

ကျားက လူကိုနိုင်
လူက ဓါးကိုနိုင်
ဓါးက ကျားကိုနိုင်
သုံးပွင့်ဆိုင်ဇာတ်လမ်း
ဇာတ်ဝင်ခန်းမှာ
ဇာအခန်းက ပါပါ
လောကဇာတ်စင်ထက်မှာ
အကွက်တူကေ
ညံ့လူခံလိုက် --။

(စစ်တွေညိုသန့်)

အလယ်မှာ မောင်နန်းလှ (မြောက်ဦး) ရွီးရေ ကဗျာတပုဒ်ပါပါရေ။ ကဗျာချေက ကောင်းပါရေ။ လူငယ်ကဗျာဆရာဖြစ်ပါဖို့။ စကားလုံးအသုံးအနှုံးမြန်မာဟန် မြန်မာပုံစံလွှမ်းနီပါသဖြင့် အနည်းငယ်ပြုပျင်လို့ ဖော်ပြပီးလိုက်ပါသည်။ မူရင်းကို စာအုပ်ရှာပြီး ဖတ်ကြည့်ကတ်ပါလီ။

မိုးသထအာရုဏ်

ညဉ့်သန်းခေါင်လေ၊ အမှောင်လွန်မြောက်
အာရုဏ်ရောက်လို့၊ ခတက်ခေါက်ကေ
စိတ်ရောက်ရည်မှန်း၊ သဒ္ဓါဆွမ်းကို
လှူဒါန်းဖို့လေ၊ ချက်လတ်တေ --။

ဂြိုးငှက်လူပျို၊ တေးခြင်းဆိုလို့
စိမ်းညိုရွက်နု၊ နှင်းထုဝီ၀ီ
လီချေသွတ်သွတ်၊ တိုက်ကာခတ်ကေ
ရင်ဖတ်အီးရေ၊ ချမ်းလတ်တေ --။

အာရုဏ်ပျိုးလို့၊ မိုးသထမှာ
နိုးထအားမာန်၊ ဗြိန်းစောင်းသံလေ
တောင်ယံကိုဟပ်၊ ဂလိုင်ထပ်ပျာယ်
ရိုက်ခတ်မြည်ဟိန်း၊ စည်တော်ကြိမ်းကေ
ကြက်သိမ်းထရေ၊ အားရရေ --။

ရောင်နီသန်းကေ၊ ဆွမ်းပန်းရီချမ်း
လှုဒါန်းမျှဝီ၊ မိတ္တာမြီမှာ
ပီတိနှိုးဆော်၊ သာထုခေါ်မိ
မှန်းမျှော်နိဗ္ဗာန်၊ သံစည်သံလည်း
မာန်စွယ်နှိမ့်ချ၊ ငြိမ်းချမ်းစွ --။

မောင်နန်းလှ (မြောက်ဦး)

(ရခိုင်ကဗျာ) ခေါင်းစဉ်အောက် အဖွင့်ကဗျာများထဲက ကျန်ကဗျာများမှာ အားလုံးဗမာကဗျာဖြစ်ပါသည်။ ချစ်ဒါလီ၏ (လူ့ဘ၀ရဲ့အလှဆုံးအချိန်)၊ ဆရာမနွယ်စစ်တွေ၏ (ငွေသောင်ယံ ခံစားမှုအတွေး) စစ်တွေပွင့်လွှာ၏ (ငွေရတုမှသည်)၊ မောင်ကြင်နွယ်၏ (ရိုးမတဖက်က ငါ)၊ မင်းရွှေစိန် (အင်းစိန်) ၏ (နိုင်ငံရေးမျက်စိဖွင့်ခဲ့သူ) ကဗျာများမှာ ရခိုင်ကဗျာခေါင်းစဉ်တပ်ထားသော မြန်မာ (ဗမာ) ကဗျာများဖြစ်ပါသည်။ နွယ်စစ်တွေကဗျာ ရခိုင်မူကို အောက်တွင်ဖော်ပြပီးလိုက်ပါသည်။ ဗမာမူရင်းကို စာအုပ်ရှာပြီးဖတ်ကြည့်ကတ်ပါလီ။ (ရှက်ဖို့ကောင်းလို့ ဖော်ပြမပီးလိုက်ပါဗျာ)

ငွေသောင်ယံခံစားမှု

ကမ်းရိုးတန်းကို
လွမ်းရေ --။

လှိုင်းကျောက်ဆောင်
ငွေကမ်းသောင်ပြင်က
သဲဖြူစင်တိကို --။

မျက်စိထဲစွဲ
ချစ်ဖို့ကောင်းစွာတိကျည်း
တမ်းတ၀မ်းနည်းယင်း
လွမ်းယပင်း ငေးယပင်း --။

ကြည့်မဆုံး
လှိုင်းတိ တလုံးပြီးတလုံး
တ၀ုန်းဝုန်းရိုက်
မုန်တိုင်းတိုက်သောခါ
ငွေလွှာဖြူစ
သဲရွရွ
ဖုန်မထဘဲ
ကမ်းကလွင့်ပျောက်စဉ်
ကျောက်ဆိုင်တောင်ကြီး
လီဟုန်စီး
ထီးမားတည်ရပ်
ဟားတိုက်ရယ်ကတ်တေ --။

ပင်လယ်တိမ်တင်းခွန်
လီချွန်သံတိုးတိုး
လှုပ်ခတ်နှိုးခါမှ
ဘ၀အထောင်းအထု
အဖုအထစ်တိက
အစစ်အမှန်တရားကို
မိကျန်လိုက်ပျာယ်လား
ကဗျာဆရာ
စဉ်းစားယင်း စဉ်းစားယင်း --။

နွယ် (စစ်တွေ)

နွယ်စစ်တွေကဗျာ ရခိုင်ဘာသာပြန်ကို (http://www.arakanmusic.com/APOEMS/message.asp?Id3=629) တွင်၎င်း၊ မောင်ကြင်နွယ်၏ကဗျာ ရခိုင်ဘာသာပြန်ကို (http://www.arakanmusic.com/APOEMS/message.asp?Id3=613) တွင်၎င်း၊ စစ်တွေပွင့်လွှာ၏ကဗျာ ရခိုင်သာသာပြန်ကို (http://www.arakanmusic.com/APOEMS/message.asp?Id3=627) တွင်၎င်း ဖတ်ကြည့်နိုင်ပါ။ စစ်တွေပွင့်လွှာနှင့် နွေစစ်တွေမှာ လုံးဝရခိုင်စကားပြောသော ရခိုင်သမစစ်စစ်ဖြစ်ပါသည်။ မောင်ကြင်နွယ် ရခိုင်စကားပြောလား ဗမာစကားပြောလား အကျွန်ုပ်မသိပါ။ အကျွန်ုပ်ကြားရသလောက် မြောက်ပိုင်းသား (မောင်တောသား) ဟု သိရပါသည်။ သံတွဲသားဆိုလျှင် သူ့ကဗျာကို အကျွန်ုပ်အပြစ်မဆိုလိုပါ။ သံတွဲမှာ ကိုလိုနီစနစ်အောက်တွင် မြန်မာမှုပြုခံလားရပြီးဖြစ်ပါသည်။ ယခုအခါ ကျောက်ဖြူကို တခြမ်းမျိုထားပြီးဖြစ်ပါသည်။

ထိုသို့ဘာသာပြန်ရခြင်းမှာ အနာဂါတ်မျိုးပျောက်မည့် အဆိပ်အတောက်များကို ရခိုင်သားများက ရခိုင်သားမျိုးဆက်သစ်လူငယ်ထုအတွင်း အတင်းအဓမ္မရိုက်သွင်းပီးခြင်းမှ အချိန်မှီတားဆီးကာကွယ်နိုင်ရန်ဖြစ်ပါသည်။ ဤသည်မှာ ရခိုင်သားတိုင်း၏သမိုင်းပီးတာဝန်ဖြစ်ပါသည်။ (မဟိစွာထက် မသိစွာခက်) ဆိုစကား ဟိရေမဟုတ်ပါလား။ သို့မဟုတ် (အသိခေါက်ခက် အနက်ဝင်) ဖြစ်နီကတ်စွာလား တွေးမိပါသည်။ အေပုဂ္ဂိုလ်များ မသိဘဲနီဖို့မဟုတ်ပါ။ ဗမာကဗျာကိုပင်လျှင် (ရခိုင်ကဗျာ) ခေါင်းစဉ်တပ်ခြင်း တနည်းအားဖြင့် (ကျွန်ဇတ်သွင်းခြင်း) မှာ ကကောင်းရှက်ဖို့ကောင်းသော အလုပ်ဖြစ်ပါသည်။ ရခိုင်ခံဖို့တောင် မကောင်းပါယာ။

အချုပ်ဆိုရလျှင် ရခိုင်သားလောကတွင် (ဆီဆွတ်) ကကောင်းများပါသည်။ (ဆီဆွတ်) ဟု ဆိုရာတွင် မြောက်ပိုင်းတောင်ပိုင်း မခွဲခြားပါ။ မြောက်ပိုင်းသားက ပိုဆီဆွတ်ပါသည်။ စစ်တွေမဂ္ဂဇိန်းမှာ စစ်တွေသား (မြောက်ပိုင်းသား) ထုတ် မဂ္ဂဇိန်းဖြစ်ပါသည်။ ဤသည်ကို မြောက်ပိုင်းသား တောင်းပိုင်းသားခွဲသည်ဟုမမြင်ဘဲ (အဟုတ်ကို အဟုတ်အတိုင်း) (အပုပ်ကို အပုပ်အတိုင်း) (အယုတ်ကို အယုတ်အတိုင်း) ယထာဘုတကျကျ ခွဲခြမ်းဖို့လိုပါလိမ့်မည်။ မည်သည့်သူကို နာစီ။ မည်သည့်သူကို သာစီ။ ဝေဖန်ခြင်းမဟုတ်ပါ။ လူငယ်ချေတိမျိုးမတုန်းအောင် ကယ်တင်လိုရင်းဖြစ်ပါသည်။

(ရခိုင်ပေါင်းကူး)

မှတ်ချက်။ ။အောက်ပါ Link ကကူးယူဖော်ပြထားပါသည်။
http://www.arakanmusic.com/UNI/message.asp?id3=773

“ရှိ” ကတ်ဖို့လား၊ “ယှိ” ကတ်ဖို့လား၊ “ဟိ” ကတ်ဖို့လား

ရခိုင်ပိုင်စာရွီးကေ “ဟိ” နန့် ကင်းလွတ်လို့ မရ။ “ချဇားရှီမှာ ဒင်္ဂါးငါးပြား ဟိသည်”၊ “သဇင်ဖြူ”မှာ “အင်္ကျီတစ်ထည် ဟိသည်”။ “မြတ်သာထွန်း အခန်းထဲမှာဟိသည်”။ “ဒေနိစားမီးပွဲဟိ သည်”။ “မောင်သာဘန်း ရန်ကုန်လားဖို့ဟိသည်”။ “သက်ဟိလူသား” “လက်ဟိအနီအထား” အစဟိရေ “ဟိ” အသုံးတိက ကောင်းဟိပါရေ။ အနက်က ပိုင်ဆိုင်ခြင်း တည်ဟိခြင်းကို ပီးပါရေ။

“ဟိ” အသုံးကို ရှိခေတ်ရခိုင်ကျောက်စာတိမှာ ပီပီပြင်ပြင် တွိရပါရေ။ ရခိုင်ကျောက်စာအားလုံး “ဟိ” ကိုရာသုံးကတ်တေ။ “ဟိ” အသုံးတွိရရေ ကျောက်စာတချို့ကို ဥပမာအဖြစ် ဖော်ပြပါမေ။

၁။ တပည်သာသိရိကဿဖသည် လုပ်အံ့သည်ဥစွာ ဟိလျှက် (မင်းထီးကျောက်စာ၊ သကြစ် ၆၅၇) ၂။ သာသနာငါထောင်စိအောင် ဟိစိသော (ဝေသာလီ ရွှေတောင်စေတီကျောက်စာ၊ သကြစ် ၈၈၁) ၃။ ပိုင်ရိုဝ် မဟိဟူ၍ ဆိုဝ်လတ်သ်ှ (မဟာဝိနိယ်ဓိုင်ကျောက်စာ၊ သကြစ် ၉၀၅) ၄။ လွန်လီပြီသောခါစောမွန်အစ ဟိသော (ကလုံတောင်ဘုရားကျောက်စာ၊ ပထမမျက်နှာ၊ သကြစ် ၉၄၇) ၅။ ၀ါးခုနစ်ဆေ ဟိရာအနက်တွင် ဆြာတော် (ကုလားတန်းစားကျောက်စာ၊ သကြစ် ၁၀၇၀) အခုခေတ် ရခိုင်ကျွန်းရွာတိမှာလည်း “ဟိ” ကို ပီပီပြင်ပြင် သုံးကတ်တုန်းသိမ့်။ ရမ်းဗြဲလီသံမှာလည်း တွိရရေ။ မြောက်ဦးလီသံမှာလည်း တွိရရေ။ အပြောဘာသာစကား မှာ “ဟိ” ကို “ဟိန့်” လို့ အသံထွက်စွာ တွိရပါရေ။

ဒေသအလိုက်အသံအယင့်၊ အယူကွဲစွာပါရာ။ မူလရုပ်ရင်းက “ဟိ” ကို ပြောစွာရာဖြစ်တေ။

ရခိုင်အသုံး “ဟိ”

(HIAE) ကို ဒေနိမြန်မာစာ၊ မြန်မာစကားမှာ “ရှိ” လို့သုံးစွာကို တွိရပါရေ။ ပုဂံခေတ် မြန်မာကျောက်စာတိမှာကတော့ “ဟိ” အသုံးရာ တွိရရေ။ ပုဂံသားတိ ပြောစကားမှာလည်း “ဟိ” ရာ ဟိလီဖို့။ ဒေနိရခိုင်ဒေသ မြို့ကြီးတိက မြို့ကြီးသားတိပါးစမှာ၊ အရွီးအသားတိမှာ “ရှိ” ကို တွိနီရပါရေ။ ရခိုင်ကျွန်းကစကား “ဟိ” ကို “ရှိ” လို့ ပြောနီကတ်စွာပါ။ “ရှိ” ကို ရခိုင်ကျွန်းစကားစစ်စစ်နန့် အသံထွက်ကေ “RHIAE” လို့ရာ ထွက်ရဖို့။ “ဟိ” ကို ကျကေ (HIAE) လို့ထွက်ရဖို့။ ( ဒေပိုင်အင်္ဂလိပ်အက္ခရာနန့် အသံထွက်ပြစွာကို Transliteration လို့ခေါ်ပါရေ။ Phonetic Symbol နန့် မတူပါသိမ့်။

Phonetic Symbol က ပညာသျှင်တိရာ နားလည်နိုင်ရေ။ အရပ်သား အင်္ဂလိပ်က Transliteration နန့်ပြကေ နားလည်နိုင်ရေ။ အင်ဒိုနီးသျှားဘာသာစကားကိုလည်း ဒေပိုင်ရွီးစာ တွိရပါရေ) “ရှိ” ကို မြို့ကြီးသားရခိုင်တိအသံနန့် ဆိုကေ “SHI ” လို့ ထွက်စွာတွိရပါရေ။ ရခိုင်ကျွန်းရွာတိစွာ ရခိုင်လူဦးရွီ၏ (၉၀) ရခိုင်နှုန်းလောက် နီထိုင်ကတ်တေ နီရာပါ။ ရခိုင်သားအများစုက ကျွန်းမှာပါ။ ယေနန့် ရခိုင်ကျွန်းရွာတိမှာပြောကတ်တေ ရခိုင်အသံထွက်ရာ အမှန်ဖြစ်ရပါဖို့။ ရခိုင်ကျွန်းရွာ အပြောစကားမှာ “ဟိ” လည်းဟိရေ။ “ရှိ” လည်း ဟိပါရေ။

၁။ နီ အရှိဘက်ကထွက်တေ။
၂။ ရဖြီးချပ်တောင်စွာ စစ်တွေ၏အရှိဘက်မှာ ဟိရေ။
၃။ မင်းရို့နှစ်ယောက် အရပ်အရှိရှိကာဝေ။
၎။ ဒေ၀ါးနှစ်ပိုင်းအရှိရှိပျာယ်။
၅။ ဆန်ကို သိုက်ဒုံနန့် ရှိရှိခြင်ခ။
၆။ ဒေနိမိုးထက် ထမင်းအရှိရှိရာကျရေ။
၇။ ရှိကိုနောက်ကို ကြည့်လို့လား။
၈။ ရှိအနာဂါတ်ကို မျှော်ကြည့်ရဖို့။
၉။ ရှိနီစောမောင်လာပျာယ်။
၁၀။ အချေတိ ရှိခိုးနီကတ်တေ။
ဒေ၀ါကျတိကိုကြည့်ကေ “ရှိ” ၏အနက်စွာ
(က) အရှိဘက်
(ခ) အရပ်အနိမ့်အမြင့် တူညီခြင်း
(ဂ) အပြည့်ဟိခြင်း
(ဃ) အပိုအလိုမဟိဖြစ်ခြင်း
(င) နောင်ဖြစ်လာဖို့ကိစ္စကို ဆိုလိုခြင်းအစဟိရေ အနက်တိထွက်စွာ တွိရရေ။ ယေနန့်
“ချဇားရှီမှာ ဒင်္ဂါးငါးပြား ရှိ သည် ။
“မြတ်သာထွန်း အခန်းထဲမှာ ရှိ သည် ။
“ဒေနိ စာမီးပွဲ ရှိသည် ။
“မောင်သာဘန်း ရန်ကုန်လားဖို့ ရှိ သည်။
“သက် ရှိ လူသား ”
“လက် ရှိ အနီအထား”
အစဟိရေ အသုံးအနှုန်းတိစွာ ရခိုင်သဒ္ဒါနန့်ကြည့်ကေ မှားယွင်းနီစွာ တွိရပါရေ။ “ဟိ” ကိုရာသုံးကတ်ရပါဖို့။

ရခိုင်မြို့ကြီးသားတချို့က “ရှိ” အသုံးမှားနီစွာကို တွိလားကတ်တေခါ နောက်ကိုတလှမ်းမဆုတ်ချင်လို့ “ယှိ”
(SHI) ဆိုပြီးပျင်လို့ ရွီးလာစွာတွိရပြန်ရေ။ ဒေနိ မြို့မှာသုံးရေ စကားသံနန့် ကိုက်ကေလည်း ရခိုင်အများစုဖြစ်တေ ကျွန်းစကားနန့်က မကိုက်။ ရုပ်ရင်းရို့၊ သဒ္ဒါရို့၊ အဘိဓာန်ရို့နန့်လည်း မကိုက်။ ယေနန့် မြို့ကြီးသားရခိုင်တိ ကျွန်းကရခိုင်တိနန့် တသားတည်းကျအောင် နောက်ကိုတလှမ်း ဆုတ်ကတ်ရဖို့ မြင်မိပါရေ။ ပြောရေခါ “ရှိ” (SHI) နန့် “ယှိ” (YHI ) ကိုဖျက်ပြီး “ဟိ” (HIAE) လို့ ပြန်ပျင်ပြောကတ်ပါမေ။ ရွီးရေခါလည်း “ရှိ” နန့် “ယှိ” ကိုဖျက်ပြီး “ဟိ” လို့ ပျင်ရွီးကတ်ကေ ရခိုင်အရွီးအသား တည်ငြိမ်လာပါဖို့။ နောက်ကို တလှမ်းဆုတ်သင့်စွာမှာ ဆုတ်ရပါဖို့။ မဟုတ်ကေ ရခိုင်စကားပျောက်လားဖို့ရာ ဟိပျာယ်။ ရခိုင်ဘာသာ အရွီးအသားကိစ္စကို လူအားနန့်လည်း ပျင်လို့မရ။ ဖေသာအားနန့်လည်း ပျင်လို့မနိုင်။ ပညာနန့်ရာ ပျင်ရဖို့။ ရခိုင်သဒ္ဒါသဘောကို စိစိကိုက်ကိုက် လေ့လာပြီးကေ၊ ပြည်သူအများပြောစကားနန့် ညှိယူလိုက်ကေ ရခိုင်အရွီးအသား တည်ငြိမ်လာဖို့ သေချာပါရေ။

(အသျှင်သူရိယ)

အကိုးအကား
(ရှိဟောင်းရခိုင်ကျောက်စာများ- ဦးဦးသာထွန်း)
အောင်တံခွန် ၀ံသရက္ခိတမဂ္ဂင်း အတွဲ(၂) အမှတ် (၁) မှ ကူးယူဖော်ပြသည်။