သမိုင်းကြောင်းကိုလေ့လာစီချင်သည်

ရခိုင်ကမ်းမြောင်ဒေသသည် ဘင်္ဂလားပင်လယ်အော်နှင့် ဆက်စပ်လျက်ဟိပြီး၊ ပင်လယ်လှိုင်းကြီး လှိုင်းငယ်ရို့သည် ကမ်းသောင်နဖူးသို့ တဘုန်းဘုန်း ရိုက်ခတ်လျက် ဟိသည်။ ရခိုင် ကုန်းတွင်းဒေသတွင် မြစ်ချောင်း အင်းအိုင် အလွန် ပေါများပြီး မြစ်ချောင်းများသည် ပင်လယ်ထဲသို့ စီးဝင်သည်။ မြောက်ပိုင်းဟိ (နတ်မြစ်၊ မယူမြစ်၊ ကုလားတန်မြစ်၊ လေးမြို့မြစ်) များတွင် မြစ်လက်တက်ပေါင်း များစွာ ဟိသည်။ တောင်ဘက်၌ မြစ်တို၊ ချောင်းတိုများသည် အရှိမှ အနောက်သို့ စီးဆင်းသည်။

ထင်ရှားသော မြစ်ချောင်းများမှာ (ဒလက်ချောင်း၊ အမ်းချောင်း၊ မအီချောင်း၊ လမူးချောင်း၊ ဆားပြင်ချောင်း၊ တန်းလွဲချောင်း၊ တောင်ကုတ်ချောင်း၊ သဌေးချောင်း၊ ပြည့်ချောင်း၊ သံတွဲမြစ်၊ ကျိန်တလီချောင်းနှင့် ဂွချောင်း) ရို့ဖြစ်သည်။ ရခိုင်မြစ်ချောင်းများတွင် ဖြားရီ အတက်အကျ ဟိသည်။ ဖြားအတက်တွင် ပင်လယ်ငါးများသည် ကုန်းတွင်း မြစ်ချောင်းများသို့ ဒိုးယိုပေါက်ဝင်ရောက်၍ ရခိုင်ပြည်တွင် သားငါး ပုဇွန် အလွန် ပေါများသည်။

ရှုတိုင်းသာစွ ရခိုင်မြီ

ကဗျာဆရာရို့က ရခိုင်ဒေသကို “ရိုးမတောင်ဆိုင်း၊ ပင်လယ်ဝိုင်း၍၊ ရှုတိုင်းသာစွ၊ ရခိုင်မြီ” ဟူ၍လည်းကောင်း။ “မြီပြင်ကျယ်ဝင်း၊ လယ်ယာခင်းနှင့်၊ အင်းအိုင်မြစ်ချောင်း၊ ပင်လယ်ကြောင်းနှင့်” ဟူ၍လည်းကောင်း။ “ကျယ်ပြန့်လှစွာ၊ ကျွန်းဦးမြီမှာ၊ သပြီခလို့၊ ရောင်မြ၀ီဝီ၊ အောင်ခြင်းညံ၍၊ အောင်သံကျူးလို့၊ ဇမ္ဗုဒီမှာ၊ သညီဝေါဟာ၊ ထောပနာနှင့်၊ သြဘာသောင်းသောင်း၊ သတင်းပေါ်၍၊ နင်းကျော်ဘိကေ၊ သရီချောင်းတွင်၊ မင်းကောင်းကြိမ်ဖန်၊ ဗဟိုရ်ညံ၍၊ စည်သံရိုက်ဟီး၊ ရွှေနန်းဆောင်ဖြင့်၊ ပြောင်ပြောင်ညီးကေ၊ မြို့ကြီးဓညာ” စသည်ဖြင့်လည်းကောင်း စာဖွဲ့ဆိုထားကြပါသည်။

ငါးများရခိုင်အခေါ်

ဤရီ ဤမြီနှင့်အတူ ရှိပဝေသဏီကပင် ရခိုင်ငါးများသည် ရခိုင်သားများနှင့် အတူ ဒိုးတူပေါင်ဖက် နီထိုင် လာခသူများဟု ဆိုချင်ပါသည်။ ရခိုင်များသည် မြစ်ချောင်းအင်းအိုင် ပင်လယ်ဝိုင်းလျှက် မွီးဖွား လာကြသူများဖြစ်ရာ တနည်းအားဖြင့် ရခိုင်ငါးမျိုးစုံနှင့် အတူ ၀ိုင်းရံ ကြီးပြင်းလာသူများပင် မဟုတ်ပါလား။ ရခိုင်ငါးများတွင် ကိုယ်စီကိုယ်စီ ရခိုင်အခေါ်နာမ ဟိပြီးသားဖြစ်ပါသည်။

ငါးသရွဲမင်းကျား၊ ဘီသျှပ်တရာ၊ ငါးခွေးပနီ၊ ပင်လယ်ငါးခူ၊ ငါးသလဲထိုး၊ သင်ပေါင်းထိုး (ခေါ်) သင်္ဘောထိုး၊ ငါးတောက်တူ၊ ငါးချိုင့်ကြား၊ ငါးပတုန်၊ ဒေါင့်ဒနာ၊ ငါးရင်းကုန်း၊ ရုဇနား၊ ငါးကန့်ဗျိုင်၊ ငါးကုန်းညို၊ မျက်ဆံကျယ်၊ ငါးဒါးလွယ်၊ ငါးပသွင်၊ စံလှမေ၊ ငါးဒလာ၊ ငါးသရွဲ၊ ငါးစရိုင်း၊ ငါးနုသန်း၊ ငါးနံ့သာ၊ ငါးစလုံး၊ ငါးဝမ်းပူ၊ ငါးရစ်မ၊ ငါးပယုံ၊ ငါးကန်သား၊ ငါးသပွေ၊ ၀ါမရှီ၊ ငါးလ၀ါ၊ ငါးပါးသျှင်း၊ ငါးနီတူ၊ ဗရဲဂါး၊ မျှိုင်သျှေ၊ စွန်သျှေ၊ဖက်သျှေ၊ ခသျှာ၊ အာဖာ၊ ဘာသျှား၊ ငါးဆူ၊ ငါးဝ ၊ ရိုးရည်၊ ငါးညို့၊ ရီခူ၊ ရီမျောက်၊ ရီကြက်၊ ဒေါင်းပြောက်၊ ပဂျင်း စသည့် ငါးအမည်များမှာ ရခိုင်သံပီသလှပါသည်။

အခြားရခိုင်ငါးများမှာ ငါးသတစ်၊ လက်ခွာ၊ ငါးတန်၊ ငါးမြင်း၊ ငမန်း၊ လိပ်ကျောက်၊ ပြင်သာလိပ်၊ ငါးရံ့၊ ငါးခူ၊ ငါးပြီ၊ ငါးရက် ၊ ငါးစွယ်၊ ငါးကြေး၊ ငါးဖယ်၊ ငါးခုံး၊ ဂဏန်း၊ ကြက်ဖားပုစွန်၊ ရီလားပုစွန်၊ ရွှေပုစွန်၊ ကျောက်ပုစွန်၊ ပုစွန်တက်၊ ပုစွန်စိတ် စသည်ဖြင့် အသီးသီးဟိသည်။

ရခိုင်ဒေသဥတုရာသီ

ရခိုင်ဒေသသည် လီပြင်းပြီး မိုကြီးသော ဒေသဖြစ်သည်။ နှစ်စဉ် မိုးရီချိန်လက္မ (၂၀၀) ကျော် ရွာသည်။ ဒေသအခေါ် (ရမ်းပေါက်လီ၊ ဆင်ခေါင်းလီ၊ ကတ္တရန်လီ) ရို့မှာ ရခိုင် ပင်လယ်လီများဖြစ်သည်။ နွီခေါင်ခေါင် လဆန်းလဆုတ် ဖြားသီရက်များမှာတောင် ရခိုင်မြစ်ချောင်းများသည် သိသိသာသာ ရီလျော့ကျလားလေ့မဟိပါ။ မိုးတွင်းခါဆိုလျှင် “၀ါဆိုဝါခေါင်၊ ရီဖောင်ဖောင်” ဆိုရေပိုင် ရခိုင်မြစ်ချောင်းများသည် ရီဖြိုးလျှက်ဟိပါသည်။

ထို့ကြောင့် ရခိုင်ငါးများသည် ရခိုင်ရီကိုကြိုက်ပြီး ရခိုင်ရီတွင်ပျော်သည်။ ရခိုင်ငါးများသည် ရခိုင် ရီမြီသဘာဝနှင့် ရခိုင်လူမျိုးများကိုခွဲခွာ၍ အခြားတပါးသို့ လားချင်လိုစိတ် ဟိမည်မထင်ပါ။ ၀ိသမ လောဘသားများ မထောက်မညှာ ဖမ်းဆီး ယူလားသည့် အခါမှသာ ပါတော်မူဘ၀သို့ ရောက်လားမည်ဖြစ်ပါသည်။

ပတ်ဝန်းကျင်ကို နှံ့နှံ့စပ်စပ်သိ

ရှိရခိုင်များသည် မိမိရို့ပတ်ဝန်းကျင်ဟိ ရခိုင်ငါးများအကြောင်းကို နှံ့နှံ့စပ်စပ် သိထားဟန် တူပါသည်။ ရခိုင်သားများ၏ဓလေ့စရိုက်နှင့်ဖြစ်စဉ်များကိုလည်း ရခိုင်ငါးများသည် အတွင်း သိမြင်ထားသူများ ဖြစ်ပေလိမ့်မည်။ နိစဉ် လူမှုကိစ္စများ၌ ရခိုင်သားများနှင့် ရခိုင်ငါးများသည် အကျွမ်းတ၀င် တွိဆုံမြဲဖြစ်သည်။ ရှိခေတ်ဦးကပင် ရခိုင်သားဘ၀၌ ရခိုင်ငါးများသည် တစင်း ထင်ဟပ်နီကြောင်းတွိရပါသည်။

ရခိုင်သမိုင်းအရ ၀ါသုဒေ၀မင်းနောက် ဗြဟ္မဏရာဇာမင်းဆက်၌ ဘီစီ (၃၃၂၅) မတိုင်မှီကာလက ကစ္ဆပနဒီမြစ်၏အရှိဘက် (၉၉) မြို့။ အနောက်ဘက် (၉၉) မြို့ တည်ဟိခသည်။ အရှိဘက်မြို့များအနက် (ငါးရန့်ချောင်းမြို့) နှင့် အနောက်ဘက်မြို့များအနက် (ငါးတန်သရဲမြို့) ဟူ၍ ရခိုင်ငါးနာမည်များနှင့် မှည့်ခေါ်ထားသည်ကို တွိရပါသည်။

ဒင်္ဂါးမှာ ခတ်နှိပ်ထား

ရခိုင်ဒင်္ဂါးသမိုင်းကို လေ့လာလျှင် အမည်ထိုး ပါဟိသော အစောဆုံးဒင်္ဂါးမှာ ဒေ၀စန္ဒြဒင်္ဂါး ဖြစ်ပါသည်။ ခန့်မှန်းသက္ကရာဇ် အေဒီ (၃) ရာစုနှင့် (၄) ရာစု စဦးပိုင်းလောက်က သွန်းလုပ်ခသော စာထိုးမပါ ပတုန်း (အမြီး) ပါဟိသည့် ပင်လယ်ခရုပုံ ခပ်နှိပ်ထားသည့်ဒင်္ဂါးအချို့မှာ နိုင်ငံခြား ပြတိုက်များ၌ ဟိပါသည်။ ယင်းဒင်္ဂါးများကို စန္ဒြားမင်းများ သွန်းလုပ်ခပြီး၊ ရှိအကျဆုံး ဖြစ်မည်ဟု ပါမောက္ခ သုတေသီ ဆရာကြီးဦးစံသာအောင်က ခန့်မှန်း ထားခပါသည်။ ဤသို့ ဆိုလျှင် ရခိုင်ငါးများသည် နှယ်နှယ်ရရ မဟုတ်။ ရခိုင်သမိုင်းနှင့်အတူ ဖွားတော်ဖွားဖက်ဖြစ်သည်ကို တွိရသည်။

ယိုင်းသာခြင်း

ရခိုင် အဘုချေ သားချော့ ယိုင်းသာခြင်းများ၌ “အမျည်မျည်၊ မှိုဟင်းခူးဇောင်လားကတ်မည်၊ မှိုဟင်းလဲခူး၊ စူးလဲစူး၊ အစူးလည်းထွင်၊ အိမ်ကိုလည်းရောက်၊ အထွဋ်တင်၊ ငယ်လင်စားဖို့၊ မျောက်လက်ညှိုး၊ ကုလားပုစွန်၊ ညှီနံ့နံ့နှင့်၊ အကျွန်မစား၊ ရွှေလင်ပန်းမှာ၊ ကြင်းလို့ထား” ဟူ၍တမျိုး။ “နင့်ဘားဘာ လူယဉ်ကျေးက လောင်းတစင်းနှင့် လားလတ်တေ၊ သားငါးရှာဖို့လားလတ်တေ၊ နင့်ဘားဘာလာကေ၊ ပုစွန်တုတ်ကို အီးယောင်ပြုတ်လို့ ကျွေးပါ့မည်” ဟူ၍တဖုံ လေ့လာတွိသိ ရပါသည်။

ငါးနှင့်နွယ်သည့် နာမည်မှဲ့ခေါ်

ရခိုင်သမက်တက် ထိမ်းမြား မင်္ဂလာပွဲများတွင် ချက်ပြီးသား ပုစွန်တုတ် နှစ်ကောင်၊ ဘဲဥ နှစ်လုံးစသည်ရို့ ပါဝင်ပါသည်။ ရခိုင် နာမည်တချို့တွင် ငါးနှင့်နွယ်သော၊ (ယက်သဲအောင်၊ ချောင်းနားအောင်၊ ငါးလုံးချေ၊ ဖားချေ၊ စံလှမေ) စသည့်ဝေါဟာရနာမများကို တွိရပါသည်။ ကနိ ရခိုင်ပြည် ကျွန်းရွာနာမည်များတွင်လည် (ငါးရန့်ချောင်းရွာ၊ ငမန်းရဲကျွန်း။ ငါးစရိုင်းချောင်းကျွန်း၊ ငါးပြီကျွန်း၊ ငါးပြီတက်ရွာ၊ တံငါရွာ) စသည်ဖြင့် တွိရပါသည်။

ရခိုင်သားများသည် ငါးနှင့်ပတ်သက်သော စကားပုံများကို ကနိတိုင် ခုံမင်သုံးစွဲနီသည်ကို တွိရပါသည်။ “ငါးမဟိလို့ မျှိုင်စွံ”၊ “ပုဇွန်ဖြူ ငါးမဟုတ်၊ ဆင်းရဲသူ လူမဟုတ်”၊ “ဖွတ်မီးကျောင်းဖြစ်၊ မြစ်ချောင်းမချမ်းသာ” စသည်ဖြင့်ဖြစ်ပါသည်။

ရှိရခိုင်းများသည် ပန်းဝှက်တမ်း ကဇတ်လေ့ဟိပါသည်။ ပန်းဝှက်ရာတွင်လည်း ရခိုင်ငါးများပါဝင်သည်။

ငါးစရိုင်းသျှေ ၀မ်းပူ၊ အအူမဟိပါ။ (၀ခွက်၊ ရီအိုး)
အ၀ီးကလာမဲမဲ၊ အိမ်မှာရောက် ရဲရဲ။ (ဂဏန်း)
ထိုဖက်ဒေဖက် လှော်တက်နန့်၊ အလယ်ဂေါင်မှာ ရွက်တိုင်နန့်။ (ငါးစရိုင်း)

အ၀ီးရောက် ရခိုင်အချို့သည် ရခိုင်အစားအစာ၊ ရခိုင်အာဟာရများကို အာသီသဖြစ်ကာ တမ်းတလေ့ဟိပါသည်။ တမ်းတသည့် အစားအစာများမှာ ရခိုင်ငါးပိ၊ သင်္ဘောထိုးပါသည့် ရခိုင်မုန့်တီ၊ သံတွဲမှ ငါးနီတူခြောက်၊ ရမ်းဗြဲမှ လက်ခွာခြောက်၊ စစ်တွေမှ ရွှေပုဇွန်ခြောက် စသည်ရို့ဖြစ်သည်။ ရခိုင်တချို့ မိမိရို့၏အဆွေ ရခိုင်ငါး နာမည်များကိုမိပျောက်ကာ တခြားအရပ်သုံး ငါးနာမည်နာမများကို လျှာတွိအာတွိ ခေါ်လျှက်ဟိကတ်ပါသည်။

ရခိုင်ငါးများမြင်ပါက “ငါးစိမ်းမြင်၊ ငါးကင်ပစ်” ဟု စိတ်ဆိုးဆိုးဖြင့် အပြစ်တင်ကောင်း တင်ပါလိမ့်မည်။ ရခိုင်သားများသည် ရခိုင်ငါးများအကြောင်း မမိအပ်ပါ။ ရခိုင်ငါးများနှင့် ရခိုင်ငါးနာမည်များကို သတိရနီခြင်းပင်လျှင် အဖရခိုင်ပြည်ကို သတိရနီခြင်း မဟုတ်ပါလား။

ယခုအခါ ရခိုင်ချောင်း၊ မြစ်၊ ပင်လယ်များတွင် ၀ိသမလောဘသားတချို့သည် နည်းမျိုးစုံဖြင့် ဖမ်းဆီး ယူငင်နီသဖြင့် ရခိုင်ငါးများသည် ကြောက်ကြောက်လန့်လန့် နီထိုင်ကတ်ရပါသည်။ ရခိုင်ရီပြင်သို့ နိုင်ငံခြားငါးများဖြစ်သည့် ကုလားပုစွန်နန့် ပလာတူးရို့သည် စုပြုံကျူးကျော်ဝင်ရောက်နီသဖြင့် ရခိုင်ငါးများသည် အယင်ကပိုင် မချောင်လည်ကြပါ။ ဖီးအန္တရယ် အရိပ်အခြေကြည့်ဗျာ တိမ်းယှောင်လားလာ နီကတ်ရပါသည်။

တနိသ၌ ကုလားတန်မြစ်ဝ လေးချိုင့်တောင်အနားမှာ ငါးသရွဲမင်းကျားတကောင်နှင့် သင်ပေါင်းထိုး (ခေါ်) သင်္ဘောထိုးတကောင် တွိဆုံကတ်ပါသည်။

မင်းကျား ။ ။ ငါလည်း တချိန်က မင်းပိုင် အဆီတ၀င်းဝင်းနန့် အကောင်ကြီးကြီးဖြစ်ဖူးရေ။ အဂုခါ အကြောင်းမလှ ပိန်ကျလားစွာ။

သင်္ဘောထိုး ။ ။ မင်းအရုပ်နန့် ငါ့ပိုင်ယှောင် ဖြစ်ဖူးရေဆိုစွာ ငါမယုံဝေး။ မင်းပါးစက အာခေါင်ပြဲပြဲနန့်။

မင်းကျား ။ ။ မယုံလည်းနီ။ အာခေါင်ပြဲနီစွာက “မချိလို့ သွားဖြဲ” စွာ။ အယင်က ငါလည်း ငါးမင်းတကာ မင်းထဲမှာ (မင်းကျား) ဖြစ်ဖူးရေ။ အခုလည်း ငါ့ကို (မင်းကျား) လို့ခေါ်ရေ။
ယင်းသို့ စကားပြောငြင်းခုံနီသည်ကို မနီးမ၀ီးတွင်ဟိသည့် ရှိမှီနောက်မှီ ပြင်သာလိပ်မကြီးတကောင်ကြား၍ ကြားက၀င်ပြောသည်။

ပြင်သာလိပ်မကြီး ။ ။ မင်းရို့နှစ်ယောက်ပြောစွာ အားလုံးကြားရေ။ သင်္ဘောထိုးလည်း မင်းကျားပြောစွာ မယုံမဟိကဲ့။ ဖြစ်နိုင် မဖြစ်နိုင် ယုတ္တိယုတ္တာနန့်ပြောကေ ယုံရရေ။ ငါက ရခိုင်ပြည်မှာ နီလာစွာ အံတိုလားယာ။ အကြောင်းကြုံလို့ ရှိဟောင်းနောက်ကြောင်း ပြန်ပြောပြမည်။ နားထောင်။

ဘုရားမပွင့်ခင်က ၀ါသုဒေ၀ညီနောင်တကျိပ်ရို့တည်ထောင်သောဒွါရာဝတီ (သံတွဲ) ပျက်သုဉ်းလားပြီးနောက် ကုလားတန်မြစ်ဝှမ်းတွင် ရှိဝေသာလီမြိူ့ဟောင်းကို တည်ထောင်သည်။ ဝေသာလီခေတ်ဦးမင်းဆက်သည် ဘီစီ (၅၃၁၆) မှစလတ်ရာ ဗြဟ္မဏရာဇာမှ ဗြဟ္မသိဒ္ဓိမင်ထိမင်း (၂၆) ဆက် နှစ်ပေါင်း (၁၉၉၀) တိုင်အောင် ရှည်ကြာသည်။ ယင်းနောက် မာရယုမင်းသည် ဓည၀တီမြို့ကိုတည်၍ ဓည၀တီခေတ်ကို ဘီစီ (၃၃၂၅) မှအစပြုထူထောင်သည်။ ဓည၀တီခေတ်သည် (ပထမ ၊ ဒုတိယ၊ တတိယ) စသည်ဖြင့် အေဒီ (၃၂၇) ထိ တည်တံ့သည်။ မာရယုမင်းသည် လှဲအတတ် ၊ လှံအတတ်၊ သံလျှက်အတတ်၊ ကျွမ်းကျင်တတ်မြောက်ပြီး နှလုံးရည်လက်ရုံးရည်ဖြင့် (၆၂) နှစ်တိုင်တိုင် ထီးနန်းစိုးစံသည်။ (မင်းနံလှနှင့် နီလဂုဏ်) မင်းရို့လက်ထက် ဆင်ကောင်ရေအလွန်များပြီး ပြည်သူရို့လည်း ဆင်အတတ် မြင်းအတတ် ထူချွန်တတ်မြောက်သည်။ ဤခေတ် အေဒီ (၁) ရာစုနှင့် (၂) ရာစုနှစ်များတွင် နိုင်ငံခြားနှင့် ကူးသန်းရောက်ဝယ်ဖောက်ကား အလွန်ကြွယ်ဝချမ်းသာသည်။ ဖရုံကာကျွန်းမှာ ဘရုက္ဆကမည်သော သင်္ဘောဆိပ်ကြီးတခု ဟိခသည်။ ဖရုံကာကျွန်းကို မင်းရို့ ငါရို့နီရာက လှမ်းကြည့်ကေ လင်းလို့ကြောင်းလို့မြင်ရရေ။

သင်္ဘောထိုး ။ ။ ဟုတ်တေ။ အယင်က ငါရို့အဖိုးပြောစွာကြားဖူးရေ။ ဖရုံကာကျွန်းနားမှာ နိုင်ငံခြားသင်္ဘောတိ ရက်ပြတ်ရက်ပြတ်ဖြတ်လားကတ်တေလတ်။

မင်းကျား ။ ။ ယေကေ မမြင်ဖူးကေလဲ့ ကြောင်းကျိုးပြောပြစွာနန့် မင်းယုံလာဗျာမဟုတ်လား။ ဆက်ပြောပါ လိပ်မကြီး။

လိပ်မကြီး ။ ။ ဓည၀တီခေတ်ကလည်း တတိယမင်းဆက်တည်ထောင်သူ စန္ဒြသူရိယမင်းလက်ထက် ဘီစီ (၅၅၄) မှာ ဗုဒ္ဓသျှင်တော်သည် ရခိုင်ပြည်သို့ ကြွရောက်တော်မူသည်။ ဗုဒ္ဓကြွရောက်လာကြောင်း ကျောက်တော်မြို့အနီး၊ တောင်ပေါက်ကြီးကျောက်စာမှာ ဗြဟ္မအက္ခရာ၊ ပါဠိဘာသာဖြင့် ရွီးထိုးထားခသည်။ ဗုဒ္ဓသျှင်တော်ကိုယ်စား မဟာမြတ်မုနိရုပ်ရှင်တော်ကို သွန်းလုပ်ခသည်။ ယင်းခေတ်ကပင် ရခိုင်ပြည်မှာ ဗုဒ္ဓဘာသာ ထွန်းကားလာစွာ ဖြစ်သည်။ ဤခေတ်၏ရုပ်ကြွင်းသက်သီအဖြစ် ဓည၀တီမြို့တော်သည် ကနိတိုင် အထင်အရှားဟိနီသိမ့်သည်။

ဓည၀တီပျက်ပြီးနောက် အေဒီ (၃၂၇) နန်းတက်သော မဟာတိုင်းစန္ဒြား (ဒွေင်စန္ဒြား) သည် ဝေသာလီ ကျောက်လှေကားမြို့ကိုတည်၍ ဝေသာလီခေတ်ကို စတင် ထူထောင်သည်။ ဘုရင်သည် အမြော်အမြင်ဉာဏ်ပညာကြီးပြီး နိုင်ငံတော်ကို ခိုင်ခန့်အောင်လုပ်ဆောင်သည်။ တစ်ရာ့တစ်ပါးသောမင်းရို့ကို အောင်မြင်တော်မူသည်။ ဝေသာလီမင်းများသည် ဘုန်းတန်ခိုးကြီးအလွန်ကြီးသည်။

တိုင်းစန္ဒြးမင်းလက်ထက် ရွှေဒင်္ဂါး၊ ငွေဒင်္ဂါးမြောက်များစွာ သွန်းလုပ်သည်။ ပန်းအတတ် (၁၀) မျိုး၊ ကြီးသွန်း အတတ်၊ ကျောက်ဆစ် အတတ်ရိ်ု့ကို တတ်မြောက်သည်။ ရခိုင်အက္ခရာစာပီနှင့် ယဉ်ကျေးမှု တိုးတက် ထွန်းကားသည်။ ဤခေတ်တွင် အာနန္ဓစန္ဒြားမင်းသည် ရှိဖိုးဖီးစိုင်လာ နန်းစဉ်ကို ကျောက်စာရွီးထိုးပြုခသည်။ ဤကျောက်စာမှာ ရခိုင်သမိုင်း၌ အလွန်တန်ဖိုးကြီးပြီး၊ ကနိတိုင် မြောက်ဦးမြို့ သျှစ်သောင်းဘုရားခြီရင်းတွင် ဟိသည်။ စူဠစန္ဒြားမင်းလက်ထက် အေဒီ (၇၃၃) အေဒီ (၇၆၉) တွင် ရခိုင်ရီတပ်အင်အား အလွန်တောင့်တင်းသည်။ ဝေသာလီမြို့ကျောက်လှီကားတွင် နိုင်ငံခြားသင်္ဘောများစွာဆိုက်ကပ်၍ ကုန်သွယ်ရောင်းဝယ်မှုပြုသည်။ လက်ဟိဝေသာလီရွာတွင် နန်းရာကုန်းဟိသည်။ အေဒီ (၈၀၀) ကျော်တွင် သျှမ်း (မဂို) ဖျက်၍ ဝေသာလီပျက်သည်။

ယင်းနောက် လေးမြို့ခေတ် (အေဒီ ၈၁၈- အေဒီ ၁၄၃၀) ကိုတည်သည်။ နန်းတည်အရပ်ကို ကုလားတန် မြစ်ဝှမ်းမှ လေးမြို့မြစ်ဝှမ်းသို့ ရွှိပြောင်းသည်။ လေးမြို့ခေတ်တွင် မင်းစိုင်ပေါင်း ပေါင်း (၆၀) ဟိသည်။ မြို့တော်များမှာ (ပဉ္စာ၊ ပရိန်၊ ခြိတ်၊ စမ္ပ၀က်၊ နေရစ္စရာ၊ တောင်ငူနှင့် လောင်းကြက်) မြို့များဖြစ်သည်။ ထင်ရှားသောဘုရင်များမှာ (မင်းရင်ဖြူ၊ ကောလိယ၊ ဒဿရာဇာ၊ အလောမာဖြူနှင့် မင်းထီး) ရို့ဖြစ်သည်။ ဤခေတ်သည် မြန်မာနိုင်ငံ၏ပထမပုဂံခေတ်၊ ဒုတိယပုဂံခေတ် ၊ အင်းဝခေတ်များနှင့် ခေတ်ပြိုင်ဖြစ်သည်။

နောက်ဆုံး မြောက်ဦးခေတ် (အေဒီ ၁၄၃၀-၁၇၈၅) ကို တည်ထောင်သည်။ မြောက်ဦးမြို့ကိုတည်စဉ် မင်းစောမွန်ကွယ်လွန်သည်။ နောက်မင်းများဆက်လက် ပြုပျင်တည်ဆောက်သည်။ မင်းဗာကြီးလက်ထက် ဘင်္ဂါ (၁၂) မြို့ကိုအောင်မြင်တော်မူ၍ ရန်အောင်ဇေယျ (ခေါ်) သျှစ်သောင်းဘုရားကြီးကို တည်ထားကိုးကွယ်သည်။ နိုင်ငံတော်ကို လက်အောက်ခံဘုရင် (၁၂) ပါးနှင့်အုပ်ချုပ်သည်။ မင်းဖလောင်း၊ မင်းရာဇာရို့လက်ထက်၊ ရခိုင်အင်ပါယာအထွတ်အထိပ်သို့ရောက်လတ်ပြီး ရီတပ်အင်အား အလွန်တောင့်တင်းသည်။ ဤခေတ်တွင် နိုင်ငံခြားသို့လည်း ပညာတော်သင်စေလွှတ်သည်။ သီဟိုဠ်သို့လည်း သာသနာပြုစီသည်။ ရီကြောင်းအားဖြင့် ပေါ်တူဂီနှင့် ဒတ်(ခ်ျ) များက ရခိုင်ပြည်ကို ရန်စောင်မှုပြုသည်။ မြောက်ဦးခေတ်တွင် ရခိုင်စာပီယဉ်ကျေးမှု လွန်စွာထွန်းတောက်သည်။ အေဒီ (၁၇၈၅) ခု၊ မဟာသမတမင်းလက်ထက် မြန်မာအမရပူရဘုရင် ဗဒုံမင်း တိုက်ခိုက်သိမ်းယူ၍ ရခိုင်ပြည်ကြီးပျက်သုဉ်းသည်။

ရခိုင်ရို့သည် ရခိုင်နိုင်ငံတော်ကြီးကို မာရယုမင်းမှအစပြု၍ မဟာသမတမင်းအဆုံးတိုင် မင်းဆက်ပေါင်း (၂၅၆) ဆက် နန်းစံနှစ်ပေါင်း (၅၀၀၀) ကျော်၊ (ဓည၀တီ၊ ဝေသာလီ၊ လေးမြို့၊ မြောက်ဦး) စသည်ဖြင့် ခေတ်ကြီး (၄) ခေတ် ရခိုင်ဧက္ကရာဇ်နိုင်ငံတော်ကြီးထူထောင်လျှက် နီထိုင်အုပ်ချုပ်လာလတ်သူများဖြစ်သည်။

ပြောစွာလည်း တအောင့်ကြာလားဗျာ။ တအောင့်နားလိုက်အုံးမည်။ အေလောက်ဆို ရခိုင်အကြောင်း အကျဉ်းသိဖို့။ ငါပြောစွာယုံယင့်လား။

မင်းကျား။ ။ ကျွန်တော်ယုံပါရေ။ အယင်ရခိုင်တိ ကောင်းစားခကေလဲ့ အခု သူတောင်းစားဖြစ်လားပါဗျာ။ “အယင်က ကျင်သန်၊ အခု ပြင်ခံ” ဖြစ်လားပါဗျာ။

သင်္ဘောထိုး။ ။ အခုပိုင် ကြောင်းကျိုးယှင်းပြလို့ ငါလည်းယုံပါရေ။ ငါရို့ အဖိုးအဘောင်တိ စိုင်ဆက်ပြောလာရေစကားကို သတိရရေ။ အေဒီ (၁၆၁၅) လောက်က ပေါ်တူဂီတိသောင်းကျန်းလို့ ရခိုင်ပြည်ကို ပင်လယ်ကြောင်းလာတိုက်တေ။ ရခိုင်ဘုရင် မင်းခမောင်းက ပြန်တိုက်ဖျက်နိုင်ခရေ။ ယင်းခါက ငါရို့သင်ပေါင်းထိုးငါးတိလည်း ရီထဲမှာ ရီငုပ်သင်္ဘောယှောင်ကူးလို့ ရခိုင်ဖက်က ကူတိုက်တေ။ ယင်းအချိန်ကစလို့ ငါရို့ကို ရခိုင်သားတိက (သင်္ဘောထိုး) လို့ ခေါ်ရေ။

ကိုင်း.. ယုံကေယုံ၊ မယုံကေနီ။

နောက်ဆုံး တိုတိုတုတ်တုတ် နိဂုံးချုပ်မည်။ မင်းရို့ငါရို့ ကိုယ့်သမိုင်းကြောင်း ကိုယ်သိဖို့လိုရေ။ မမိဖို့လိုရေ။

(သာမြ)
ရခိုင်သဟာယအသင်း အမှတ် (၄) မှ ကူးယူဖော်ပြပါသည်။
ကျမ်းကိုးစာအုပ်များ
၁။ ဓည၀တီရာဇ၀င်သစ်။
၂။၁၉၆၈ ခုထုတ် ရခိုင်ညွှန့်ဖူးမဂ္ဂဇင်း။
၃။ ဦးလှဒင် (ဘာသာပြန်) ရတနာရွှေမြေ၀တ္ထု။
၎။ ဦးစက္ကိန္ဒရွီး ရခိုင်ယဉ်ကျေးမှုများ အမှတ် (၁) ၊ (၂)၊ (၃)
၅။ ဦးစံသာအောင်ရွီး အာနန္ဒစန္ဒြ။
၆။ ရခိုင်ပြည်နယ် ပြည်သူ့ကောင်စီထုတ် ပြည်နယ်ဖြစ်စဉ်သမိုင်း (ပထမတွဲ)။
၇။ ဦးစောလှအောင်ရွီး၊ မဟာမုနိ၊ စက်ဘုရားသမိုင်း (အကျဉ်းချုပ်)။

မူရင်းစာမျက်နှာ http://www.arakanmusic.com/UNI/message.asp?id3=834 မှ ကူးယူဖော်ပြပါသည်။